Executive日記——女友裕美揸機拍片估錯特朗普連任林作裸跑找數

Executive日記

KellyChu

2020-11-09 04:16 HKT

生活專欄

內容

　　美國總統大選，大局底定，民主黨拜登當選，已無懸念，但唔少網絡KOL變身「燈神」，貼錯特朗普會連任，其中包括從事保險業嘅林作，佢曾揚言估錯就會喺尖沙咀廣東道裸跑，被網民質疑佢「走數」，林作喺網上搞咗一輪動作之後，終於由女友裕美揸機，拍下祼跑短片找數，但依然惹起網民劣評如潮。
　　林作喺美國大選當日（三日）晚上發帖文，打賭如果拜登贏出，「我夜晚十二點放工廣東道裸跑一段為佢贈興又點話？」佢之後幾日再出post，以「Why so serious？」、「寫定遺書，準備裸跑」和「認真便輸了」作回應，但遲遲未有行動，被網民質疑佢「走數」。直到拜登昨天宣佈勝選，林作開放留言區，等網民投票決定佢係咪要裸奔，即惹來網民恨批佢「咁無誠信，學咩人賣保險」、「唔好死剩把口啦，找數」。
　　去到昨晚，林作透露託女友裕美揸機，影佢祼跑。網上有照片流出，見到林作喺半夜戴住一個黑色口罩落街裸跑，但其下半身及敏感部位就用咗「格仔」遮住。但網民似乎唔收貨，繼續大罵「無觀眾嘅？黑媽媽又戴口罩，我認唔到囉」、「不如喺你自己屋企裸跑都得㗎啦。不停欺騙大家。」
　　小妹提提大家，喺公眾地方猥褻暴露其身體任何部份，屬刑事罪行，最高可處罰款一千和監禁六個月，大家唔好以身試法。
Kelly Chu