關志康 - 平安三寶還欠一寶 | 神耆商機

神耆商機

關志康

5小時前

產經專欄

內容

　　近年，「平安三寶」（即平安紙、預設醫療指示及持久授權書）越來越多人認識和重視。飯局上，一位有錢朋友分享理財心得：「買樓我很少會『full pay』，即使手頭現金充裕，我都寧願造按揭，象徵式借一成。利息付得不多，但有銀行幫手把關，買錯樓的機會細咗，而且仲免費幫你保管屋契。」

　　席間，一位退休律師回話：「你幾醒，銀行持有的樓契無假啦！不過，唔少人以為簽齊『三寶』就萬無一失，其實更關鍵還有另一『寶』─詳細的遺產清單。我處理過不少個案，遺囑文件齊備，但搵唔到樓契，原來鎖喺一個無人知的保險箱內，就連密碼都失傳。」

　　律師放下筷子繼續解釋：「大家都聽過海盜張保仔金銀珠寶多，但如果無寶藏圖（即遺產清單），就算有寶都難搵到。所以趁未老，記低每張契放邊、保險箱密碼是甚麼。如果無一份清楚的遺產清單，連資產位置都唔知，俾你一億都冇用，只能自己慢慢去『張保仔洞』尋寶啦！」

　　另一位長者補充：「還有大大小小公司、離岸公司股權、各類保單，甚至『食之無味，棄之可惜』的抵債資產，常因年代久遠而被遺忘。我有間戲院喺韶關，係押品沒收回來，自己都未見過『實物』。計我話，其實古董、首飾、手錶等實物資產清單更加要清楚，哪個是高仿贗品？哪個是真正珍藏？有照片一目了然。」

　　華人社會對身後事多有忌諱，往往避而不談，反而令資產承傳在全球化環境下更見複雜。許多早年在內地或東南亞購置的物業，當年價錢平得似「買菜」，事隔多年也未必記得。一位高人忍不住插話：「『好仔不論爺田地，好女毋論嫁妝衣！』你哋講到咁複雜，我就寧願『die with zero』。今餐我埋單，『財散人安樂！』」

健康教育基金會主席
關志康