乜都5G｜抗疫「苦」年5G成得令救星 - 古星輝

乜都5G

古星輝

2022-02-11 00:00 HKT

產經專欄

內容

今日係虎年首度與各位讀者見面，恭祝大家虎虎生威！心想事成！如虎添翼！通訊事務管理局喺過年前提到，香港已經有近三成用戶用緊5G，我預計呢個數字喺今年上半年可能會有意想不到嘅增長。點解咁有信心？事實上，5G如猛虎，速度快、反應敏捷（極低時延），而嚟緊幾個月，有三大誘因造就各位入市嘅最好時機，香港5G滲透率虎年開紅盤不是夢。
矚目手機型號首季登場

手機商已經準備就緒，先有三星喺前晚舉行咗旗艦機發佈會，宣佈即將推出今年Galaxy S22系列旗艦手機，一門三傑滿足不同需要，其中Galaxy S22 Ultra嘅S-Pen反應比前更快，係各位攻頂之選。除咗三星，外媒傳出Apple將會喺下月8日舉行一個網上發佈會，報道指出其中一款會係入門版5G iPhone，甚至稱佢為新一代嘅iPhone SE。呢個消息如果屬實嘅話，對果粉們絕對係好消息，相信可以吸引到更多用家加入5G行列。
「靚頻」年內推覆蓋再強化

未升級嘅用家，好多都仲會擔心覆蓋未夠全面，其實喺5G推出嘅頭半年，覆蓋已經同4G所差無幾；而去年更有國際知名手機網絡質素數據研究公司指出，香港四間網絡商嘅5G可用率都打入全球Top 20，稱得上係世界級。好似我之前所講，隨住700MHz頻段嘅5G「靚頻」年內推出市場，呢個低頻段頻譜滲透力更強更廣，可以再強化5G嘅覆蓋，嚟緊嘅5G網絡只會愈用愈好。
一人一5G寬頻　在家抗疫

近日大家閉關在家工作、網上會議或者上網課，都會發現連線質素好重要，例如平日未必太介意屋企嘅Wi-Fi接收差或者唔夠快，不過近期成日留喺屋企，自然對網絡連線有要求，唔想同屋企人爭Wi-Fi，最好當然用5G寬頻呢個私人寬頻，有咗佢網上開會或上課唔會窒之餘，更唔怕影響屋企人上網睇片打機。計我話，一人一5G寬頻，好快會成為一個潮流。
和記電訊香港行政總裁
古星輝