頭條戲場 - 越洋獨家訪問 減45磅拍《叛諜裁判3》 68歲丹素華盛頓拍外景 快樂撩阿婆｜頭條戲場
丹素華盛頓主演的《叛諜裁判3：終極一戰》剛在港上映，作為最後一次演麥戈（McCall）實在好值得紀念，跟丹素作越洋訪問，笑談68歲拍打戲仲親身上陣，又提到在意大利拍外景行800級樓梯叫晒救命，遭當地90幾歲阿婆恥笑，更自爆在當地口花花撩阿婆的趣事，原來金像影帝份人咁鬼搞笑。
撰文：廖思慧 攝影：John Russo
化妝及髮型：LaShawti Janifer 服裝：Linda Medvene
為了拍《叛諜3》，丹素做了兩年準備，例如體形上的轉變，「2022年初開始減肥，搣甩大約30磅，後來再減多15磅。《馬克白》中有句對白，主角談到生命中的『黃葉』狀態，即係我o依家，不再年輕。不過冇所謂，目前我身體、精神及心理都處於最佳狀態。我想知道自己的極限係咩？仲可以做咩？」
68歲日日練拳
戲中有大量埋身肉搏場面，全部由丹素親身上陣，「多年來，我一直有練拳。所以呢幾十年，仍可以拍打戲。」驚訝他68歲仍keep住打拳，丹素笑言：「每朝起身，拳擊是我訓練的一部分。你要明白，我係人老心不老呀。」他再笑言：「我有位超強的替身演員，我叫佢做盡所有動作場面，然後將功勞都歸於自己（笑）。所以，打人的時候，仍是我親身演出！被打就通常是替身上陣！哈哈。」
丹素講到停唔到，提到在靚爆外景地意大利的Atrani有唔少奇遇，「要行800幾級樓梯先去到山頂教堂，但我個勞損膝頭畀我嘅感覺好似行咗1萬級樓梯，以為上山難，落山更辛苦，但有90幾歲婆婆從我身邊行過，佢哋將手放身後，好悠然咁上落長樓梯，好似同我講，『我日日都行，後生仔乜你咁虧？』」對於老婆婆，丹素好有感覺，「我又遇到一個好細粒，大約80幾歲的老太太，唔識英語，我搵人同佢講，佢係我新女友，然後婆婆拉住我好開心，大家都笑，原來婆婆回應我，『係呀，好啦，靚仔你係我新男友，我即刻帶你返屋企。』全場大笑。」
