阿碌開咪｜香港最幸福的生意
《名家合集》收錄名人文章，分享觀點，探討時事。
2022-08-18 09:38 HKT
字體大小
周一早上七點，如常走入去慣去的茶記。嘩！乜咁早幾位「的士老是佛」已坐定定，開《城市論壇》。枱面有份《星島日報》，攤開當日頭條，人人七嘴八舌發表「偉論」。
講開又講，近期《星島日報》，不少頭條都觸動到個別人士神經（馬會大董爭霸戰為典型），與其他報章的大路新聞有點不同。
呢呢，周一頭條又係「異類」，標題：《500呎單位需花300萬，或削利潤求出售，私樓建築費飆兩成，發展商歎捱打》。
內容指環球物流及原材料價格急升，建築成本平均加百分之五至七。地產建設商會「大佬」梁志堅指，如今建築費每方呎已升至五千、六千元水平（冇講乜野質素樓盤喎，大哥！），發展商又唔敢加價，於是只好削減利潤應對。
哈哈，今日個《城市論壇》，明顯篤正茶記老闆財叔條神經綫，第一個搶住發言。
財叔：「各位大佬！喺香港做生意，得嘅，幾大要做發展商！邊有咁鬼幸福㗎，賺少啲啫，已經成為報章頭條！原材料加價？我哋呢行最清楚，但我夠唔夠膽轉嫁畀各位大佬吖？今年年頭，一個早餐三十三皮，都只敢加一蚊咋。有冇報章訪問下我，等我吐苦水呀？」
肥佬華：「唉……咪係。我哋哎吔叫做的士車主，都係做生意，個牌由七百幾萬元掟到落嚟如今四百幾萬元，慘到無倫，蝕到眼凸，點似地產發展大哥咁，賺少啲變新聞㗎，香港獨有！」
高佬強：「係囉。我哎吔讀過大學經濟100，故此，知道任何商品，當然包括的士牌、食物，以至物業，全部定價只講供求，不講成本㗎啦。老實講，消費者鬼理你成本幾多咩？我個牌七百幾萬元投返嚟，唔通同乘客喊咩？大佬，咁嘅成本，日日蝕住做㗎！」
我聽落都各有道理。大家只要睇睇幾大發展商每年業績報告，就知佢哋長期以來，全部賺到「肥到着唔到襪」，羨慕死其他生意人。所以，如今只係賺少啲啲，其實應該低調少少，老友，好多「酸葡萄」㗎！
曾智華
阿碌開咪
資料圖片
最Hit
79歲TVB視帝移民加國31年終回流！宣布將移居內地呢個城市 曾自爆與女星太太長年「分居」
2025-10-08 09:00 HKT
湖南男子按摩猝死大腿有精液 家屬向足浴店索賠113萬 法院這樣判
2025-10-07 21:12 HKT
李思捷罕曝光感情生活 與「嫩口劉佩玥」拍拖逾10年：靚到不得了 大量家庭照流出家姐都係圈中人
2025-10-08 10:00 HKT
連鎖點心店全線結業！點一龍荃灣分店10月結束 網民不捨：美好的終會失去
2025-10-08 13:10 HKT
更多文章
