阿碌开咪｜香港最幸福的生意
《名家合集》收录名人文章，分享观点，探讨时事。
2022-08-18 09:38 HKT
字体大小
周一早上七点，如常走入去惯去的茶记。哗！乜咁早几位「的士老是佛」已坐定定，开《城市论坛》。枱面有份《星岛日报》，摊开当日头条，人人七嘴八舌发表「伟论」。
讲开又讲，近期《星岛日报》，不少头条都触动到个别人士神经（马会大董争霸战为典型），与其他报章的大路新闻有点不同。
呢呢，周一头条又系「异类」，标题：《500呎单位需花300万，或削利润求出售，私楼建筑费飙两成，发展商叹挨打》。
内容指环球物流及原材料价格急升，建筑成本平均加百分之五至七。地产建设商会「大佬」梁志坚指，如今建筑费每方呎已升至五千、六千元水平（冇讲乜野质素楼盘㖞，大哥！），发展商又唔敢加价，于是只好削减利润应对。
哈哈，今日个《城市论坛》，明显笃正茶记老板财叔条神经线，第一个抢住发言。
财叔：「各位大佬！喺香港做生意，得嘅，几大要做发展商！边有咁鬼幸福㗎，赚少啲啫，已经成为报章头条！原材料加价？我哋呢行最清楚，但我够唔够胆转嫁畀各位大佬吖？今年年头，一个早餐三十三皮，都只敢加一蚊咋。有冇报章访问下我，等我吐苦水呀？」
肥佬华：「唉……咪系。我哋哎吔叫做的士车主，都系做生意，个牌由七百几万元掟到落嚟如今四百几万元，惨到无伦，蚀到眼凸，点似地产发展大哥咁，赚少啲变新闻㗎，香港独有！」
高佬强：「系啰。我哎吔读过大学经济100，故此，知道任何商品，当然包括的士牌、食物，以至物业，全部定价只讲供求，不讲成本㗎啦。老实讲，消费者鬼理你成本几多咩？我个牌七百几万元投返嚟，唔通同乘客喊咩？大佬，咁嘅成本，日日蚀住做㗎！」
我听落都各有道理。大家只要睇睇几大发展商每年业绩报告，就知佢哋长期以来，全部赚到「肥到着唔到袜」，羡慕死其他生意人。所以，如今只系赚少啲啲，其实应该低调少少，老友，好多「酸葡萄」㗎！
曾智华
阿碌开咪
资料图片
最Hit
保时捷︱山东家属爆窗攞AED救人 车主霸气一句网民赞器量大
2026-03-15 17:35 HKT
韩国旅客食茶记睇中奶茶杯？老板坚称不卖后1招霸气回应 数万网民激赞：输出香港文化
2026-03-15 15:31 HKT
小学作文唔畀写「雪糕」？老师圈错改「冰淇淋」港妈大控诉：香港只有雪糕车 掀网民总动员考证｜Juicy叮
2026-03-15 12:59 HKT
中菜馆点心半价抢客！坚持新鲜现做「非预制」网民热议：要多啲支持帮衬
2026-03-15 18:02 HKT
伊朗局势 | 特朗普指盼中方协助开放霍尔木兹海峡 外交部：再次呼吁各方立即停火
2026-03-16 08:38 HKT
纸巾抹眼镜不会刮花？洗洁精恐损镜片变蒙 专家拆解洗眼镜谬误+1分钟正确清洗技巧
2026-03-15 10:00 HKT
更多文章
