【阿碌開咪】郵政署弱雞競爭力
《名家合集》收錄名人文章，分享觀點，探討時事。
2021-08-07 07:46 HKT
字體大小
打從二○○四年領展部署上市，小弟已不停在電台節目《晨光第一線》及《LTV Cafe》強烈推介，建議小投資者「有錢就買」！
點解？因作為公務員，我最清楚公務員心態——（一般咋，唔係個個！）做又三十六，唔做又三十六；按章工作，切勿出錯；切忌被指官商勾結；不求賺錢，但求合規。
冇人要求公務員似商人——以利潤為最高目標，一切只以安全為最終目標。
有一段時期，前特首曾蔭權出Memo畀全港公務員，要求「Think Out Of The Box」，即係多點創意，切勿因循。
結果反應麻麻。因若「Think錯咗」出事，邊個會照你？上司當然紛紛彈開自保！
回說領展，當年我給小投資者的分析——基於公務員唔識/冇興趣追求利潤，因此任何「商品」落在佢哋手，皆不會/未能反映真正價值，直至落入市場手，由商界人士處理，才會見「真章」。
事實，二○○五年前，所有屋邨商場及停車位管理極差，整體裝修又殘又舊，破破落落，尤其洗手間，不少更屬「慘不忍睹」，如何能吸引顧客及提升租值？不過，你想班公務員點？搞靚佢吸引人流再加租？有乜誘因呢？冇！
所以，領展籌劃上市時，我已預視呢隻「鵝」一旦落入自由運作市場，必定很快釋出屋商場及停車場的真正價值，狂生「金蛋」，升到嘭嘭聲，起碼有十年不斷上升走勢！
結果？我錯！不是十年，是十四年！由二○○五年約十元起步，升到二○一九年中的接近一百元，才緩緩回調。當年接受我忠告者，連升幅，連利息，至今有多少倍回報？
今日突然想起領展，因近期需要寄出新書，多啲去郵局。發覺，唉……大部分老弱殘兵，按章工作慢慢來，效率完全不似現代的香港。於是一個轉身，改用順豐速遞，又現代又迅速，全面科技化，效率快，價錢合理。
相比之下，郵政署究竟仲有乜存在價值呢？
曾智華
阿碌開咪
資料圖片
最Hit
長生津覆檢開始！長者注意紫色通知書 未如期申報或被暫停津貼（ 附最新資產限額＋填表須知）
2026-04-03 19:21 HKT
在職家庭津貼2026/27｜4月上調入息資產限額 申請資格/津貼金額/一次性額外款項一文睇清
2026-04-04 11:53 HKT
西貢區議員發現將軍澳居民「小福利」？深夜搭港鐵仍有列車服務 街坊網民解構出於1原因
2026-04-04 11:00 HKT
更多文章
