【阿碌開咪】僱主一定要硬食

《名家合集》收錄名人文章，分享觀點，探討時事。

2020-12-18 10:24 HKT

內容

香港打工仔，十個起碼有八個希望「做生意」，因為見到的大富豪，個個為生意人，所以，產生無限幻想，以為做生意與發達，有一個等號。係真唔係真？香港起碼有十萬計打工仔嘗試過做生意，等佢哋話你知，實情幾咁「血淋淋」啦。小弟哎吔試過做生意，之後，百分之一千肯定自己絕冇做生意之能耐及天分，故此立即投降，一世都咪搞！

一般人只見到生意人的風光，賺大錢後的意氣風發，但過程呢？有幾多人會知道？再者，十個生意人，八個失敗兼蝕到褲穿窿，又有幾多傳媒報道？

打工最過癮是明買明賣，收工拍拍屁股走人，東家唔打打西家，月尾自動過數出糧。打大集團工，更有齊保險、醫療、補水、花紅，僱主又幫你供一半強積金，被炒則按法例補償……

通常打工仔只多看到自己不利一面，好少睇到有利一面，所以，多數「滿肚苦水」，怨天怨地背後鬧老細。冇乜啱唔啱，人性也。

做老闆又如何？當然好多辛酸，但勝在有機會發達噃。打工想發達？一世唔使諗！食得鹹魚抵得渴，你做得老闆，點可以只享受發達風光而唔啃晒所有附帶的「苦楚」？

其中一項「苦楚」，原來好多老闆唔知，就是你的員工是有「公民責任」的。做個良好公民，責任之一，為隨時被法庭召去做陪審員！絕對不可呻！一如員工懷孕及生病，你絕不可以怨，因你是僱主，一定要硬食，一定要畀足人工！員工履行公民責任也如是。若件案「唔好彩」審幾個月，你就要照支幾個月人工，知冇？唔知？唔願？咁就咪學人做老闆，做回打工仔啦！

今日抽起條筋講呢個話題，因周梓樂死因研究審訊，竟有個陪審員話僱主要求佢上班。員工上庭做陪審員，就等如上咗班，呢個普通常識都冇，分分鐘觸犯《陪審員條例》，犯刑事罪行，可判罰款二萬五及監禁三個月。

喂喂喂，學人做生意、做老闆，咪烏卜卜呀！

曾智華

阿碌開咪

應法庭要求當陪審員是公民責任。資料圖片