【阿碌開咪】高官的死穴

名家合集

《名家合集》收錄名人文章，分享觀點，探討時事。

2020-12-07 09:29 HKT

時評專欄

內容

這個世界，天生我才，每人皆有其專長。不過，上天亦好公平，冇人是通才，乜都識，乜都強，乜都掂，美國總統也如是。

香港的高官，尤其AO出身，打到上頂層的，多數有種傲氣，覺得自己好鬼掂、好打得。

弊在正如葉劉淑儀離開政府，經直選洗禮後，清楚指出，大部分高官皆離地。

「好簡單，住有官邸，出入有專車司機，個個月有豐厚月薪，從來無憂，所有小事包括訂位、叫外賣、買乜，也可吩咐秘書或司機做。日常關注的，只是累積咗幾多假、放假去邊處旅行，再研究有幾多福利可申請（大意）。」

小弟做咗三十幾年公務員，絕對可以印證葉劉所講，百分百準繩！所以頂級高官唔識買廁紙、唔識用八達通，是「正常」而非「反常」。

昨晚與一著名商家「大S」晚餐，佢笑到見牙唔見眼：「阿碌，今鋪相信『賭王』在天堂都笑到碌落地，因佢個仔真係青出於藍，玩到高官殘呀！哈哈哈！」

「大S」講乜？正是講「小賭王」何猷龍果然犀利，竟然可以將隻爛船「珍寶」，一野就卸咗畀政府，連垃圾處理費都慳埋。難得政府仲以為執到，大肆宣揚，更在《施政報告》大鑼大鼓公布。

「阿碌，嗰隻爛船，邊個做邊個蝕，年初冚旗養老鼠。大家有機會經過，若見到其背脊更必嚇一跳！要重新裝修？幾千萬元冇走雞！何仔其實早早頭都痛點搞，因拆咗佢當垃圾處理，又或拖出公海『沉屍海底』，全要巨大支出。」S哥猛灌紅酒笑卡卡：「如今甩難，仲變咗政府恩公，真係世界奇聞！其實我過去幾十年與N位高官交手，發覺佢哋一涉及商業領域或生意常識，就會變得極其Naive。因為踏入政府後，開始就唔使愁錢，所以對賺錢、蝕錢及商場的蠱惑招，根本是小學雞，怎不畀人玩到陀陀擰？」

我必須承認，一講錢，就是公務員的死穴，因大家只講遵守規矩，從不講遊走灰色地帶牟利，而生意人剛剛調轉呀！

曾智華

阿碌開咪

葉劉淑儀離開政府，經直選洗禮後，清楚指出，大部分高官皆離地。資料圖片