【阿碌開咪】炒人要講「藝術」

名家合集

《名家合集》收錄名人文章，分享觀點，探討時事。

2020-12-04 10:15 HKT

時評專欄

內容

商業世界，請人、炒人天天發生，正常過正常，閒過立秋。

今年至明年（起碼上半年），大量行業受疫情打擊重創，早前有政府補貼，但正是長貧難顧，大家到年底及明年初，也需要面對現實，咬咬牙，或停業，或執笠，或裁員，或凍薪減薪……

周二有線電視炒人搞到一鑊粥，同業無不搖頭歎息。小弟認識的幾位大集團管理人，一致認為有線新聞部高層手法差勁拙劣，搞到機構內外天怒人怨，肯定有大量用戶Cut台，唔知點收科。

昨晚約咗香港著名管理人「總裁T」開餐，自然地，也提及炒人的方法。

「碌Sir，做得機構管理人，遇逆境，當然要啃這艱難任務。高手的，必定做到：一、無損公司形象；二、留下的及離開的員工皆理解；三、過程要有鋪排，顧及同事面子及自尊；四、切記勿讓員工懷着仇恨之心離開，以防做出傷害公司的舉動！」

各位，有線炒人，以上四項，有冇做到呢？

T總裁分享經驗：「凡要裁員，中下級的，就由主管交名單，佢哋最清楚邊個應該留、邊個應該先走。有咗名單後，再排優次。最基本當然要做到依法賠足。未夠！若預算許可，再畀多半個月至一個月人工，令被炒者內心好過，起碼覺得公司有點點大方，不會產生仇恨。此外，由主管向每位被裁者發兩封信，一封感謝信，表揚其貢獻，另一封推薦信，方便再搵工，內容必須讚到佢飛起！全部由我親筆簽名！」

「唔，裁中下屬員工就如此，咁要郁手裁高層又應如何鋪排呢？」

「面子一定要畀足！誠心解釋公司困難，提議佢主動用得體理由辭職，賠償照畀，對其他同事交代時，要表示『多番挽留不果』！高調搞歡送宴，席上再三致謝及送精心挑選紀念品。強調公司大門永遠為佢而開！記着，高層對公司的機密及競爭策略最清楚，分手時，必須做足不反面保護性部署！」

真係多學問，簡直是藝術！

曾智華

阿碌開咪

有線寬頻日前裁員百人。資料圖片