【阿碌開咪】身先士卒自己落水
《名家合集》收錄名人文章，分享觀點，探討時事。
2020-12-01 11:25 HKT
字體大小
做過大機構管理層者，必知推新政策的基本原則——冇信心，咪推。若推，自己行先！
跨國機構請MT（ManagementTrainee），培育成未來管理人員，一定要個個由底層做起，了解「民間疾苦」及最基層員工的感受。例如麥當勞，想做經理？唔該先由洗廁所、通油渠、倒垃圾……等做起，攞個Touch！
小弟想講乜？正想講《施政報告》中，極多人談論內裏的「大灣區青年就業計畫」。
特首一廂情願希望香港年輕人能回大灣區工作，為了鼓勵參加者，政府願意鋪晒路，介紹機構，安排住宿，更提出一般職位補貼月薪一萬八千元，以及創科職位補貼二萬六千元。聽落好似好吸引，但我做了一個「小圈子調查」，問問身邊年輕人有冇興趣。結果一如所料，問十個，八個一口拒絕，兩個則嘴藐藐話：「唔該叫高官、民建聯、工聯會、經民聯、自由黨……所有建制核心人馬，安排自己仔女做第一批先啦！若佢哋肯身先士卒，莫講二千個，二萬個都必爆額，成功硬啦！」
香港年輕人自由慣，所以頂嘴駁嘴也反應快過人，但……又不是冇道理。真的，若我是特首，必定政策出台前，已私下搞掂建制陣營，班夠「馬」才開波，好好睇睇，以免被指——叫人去，你哋啲仔女又唔去？
小弟再問年輕人為何咁抗拒回內地工作？原因完全無關工資及住宿等「基本需要」，而是覺得政治理念不同，有點擔心外，更重要因個個日日手機不離身，你叫佢哋去一個「資訊不自由」地方工作？當然走夾唔唞（老派用語）。
其實我睇睇個《施政報告》，林鄭真是自相矛盾。一方面鼓勵科研人才到大灣區工作，另一方面又揚言掟二十億元開「傑出創科學人計畫」，招攬海外科研人才來港。
搞乜呀？呢方面鼓勵自己的創科人才返內地（輸出），另一方面又大力招攬創科人才來港（輸入），究竟想點呢？真係一嚿雲！
曾智華
阿碌開咪
資料圖片
最Hit
更多文章
