【阿碌開咪】防疫限聚絕不應「藥石亂投」
《名家合集》收錄名人文章，分享觀點，探討時事。
2020-11-30 09:12 HKT
字體大小
過去兩年，香港多咗大量市民講粗口，不分性別，不分年齡，不分學歷，不分專業……點解，唉……無謂畫公仔畫出腸了。有點理性及分析能力者，有邊個唔知，有邊個唔心照？
前晚與兩位老友晚飯，其中一個「夜店F」經營酒吧，飲咗兩杯（都未飲大呀！），粗口已燒炮仗般噴到似滿天星。小弟無意撳佢，更無意勸佢冷靜，因任何人「着佢對鞋」，都會㷫到爆炸。想詳盡知道點解，大家可上網重溫《星島日報》上周五A19頁的一個全版廣告，讀後必有極大共鳴感。
呢個廣告，標題非常震撼：《請救救我們！》，然後三分一版由無數執笠街鋪相片拼成一個「苦海圖」，真係見之無不神傷。
做人做事，我哋有幾句：食得鹹魚抵得渴、出得嚟行預咗要還、受人錢財替人消災……
全部是心甘命抵接受可能出現的逆境，因為預咗，預咗乜？硬食！
不過，若果情況是「黑狗偷食，白狗當災」，咁就完全唔同。大佬呀，你犯錯，繼續逍遙，但就由我孭起災難後果？呢個係乜嘢邏輯先？
政府防疫限聚，人人都知有需要，但絕不應「藥石亂投」，應禁唔禁，唔應禁就一棍扑爛人家飯碗！將心比己，想唔激到爆炸再爆粗就難。
香港自從疫情開始，爆過好多乜乜物物群組。對，早期酒吧業也中過招，不過，一為搵食，二為保護自己，有目共睹，呢個行業非常積極搞防疫。結果，慢慢可以先兩人，後四人，先午夜，後凌晨咁，逐步放寬經營，搵啖食。
事實今年九月以來，在持牌酒吧或夜店中，並未出現新冠病毒群組。就算連最多人擔心的「萬聖節」，歡愉之後也冇事。
豈料唔關酒吧事的跳舞場所出事，政府竟然一棍掃落酒吧業，唔准開！更離奇，「白狗」跳舞場所竟毋須全部關閉。
呢下想唔火都嚟就難！F佬作為酒吧業內領頭人物，M到政府個決定飛起，但有根據。且看本周「陳姑娘」又點搞嘞！
曾智華
阿碌開咪
編按原題為「想唔講粗口都幾難」
今年九月以來，在持牌酒吧或夜店中，並未出現新冠病毒群組。資料圖片
最Hit
長生津覆檢開始！長者注意紫色通知書 未如期申報或被暫停津貼（ 附最新資產限額＋填表須知）
2026-04-03 19:21 HKT
谷婭溦退出《中年好聲音4》評審團 網民反應兩極 接任人選引發熱議
2026-04-05 12:00 HKT
六合彩｜8000萬復活節金多寶攪珠結果 頭獎一注中幸運兒擸8114萬 齊來對冧巴 !
2026-04-04 21:33 HKT
更多文章
