【阿碌開咪】哈！你玩野？

名家合集

《名家合集》收錄名人文章，分享觀點，探討時事。

2020-10-12 08:38 HKT

時評專欄

內容

　　上周五睇完長者早場，駕車回家途中，聽新聞。去到其中一段時，內容令我不期然自言自語：「喂喂喂，你係咪玩野？」

　　首先講下背景，小弟上世紀七十年代加入傳播媒介，主要做綜合性節目及時事節目，所以，有機會接觸各界著名人士（做傳媒的最大好處！），後來更每周訪問一位政官經商，以至學界、傳媒界頂尖者。久而久之，對香港最高權力一班人的心態、能力、胸襟、性格……有不淺的掌握。所以，小弟經常說笑：「我有一本《香港名人錄》，內有全城猛人評分。邊個真堅料、邊個水鬼升城隍、邊個親英、邊個親中、邊個只可做阿二（做阿一即瓜！）……呢本《名人錄》以相馬論馬方式評分。多年下來，真係好鬼準㗎！」

　　例如小弟上世紀八十年代已批定，整個親北京陣營，只得一個曾鈺成最具潛質，中英文耍家（香港大學尖子），分析力強，人脈遼闊，能與各方溝通，仲有係心思細密。

　　結果，老友，到今日有邊個建制政界人士能力及智慧，能超越Jasper（佢洋名）？當然包括曾做特首的梁振英。

　　好嘞，講番點解我聽到段新聞笑到幾乎甩牙，因為，唔……可能曾鈺成已徹底決定退休，不再謀求任何權位，故此，在新一集的《鏗鏘集》中全面爆料。

　　最搞笑一段為，上任特首梁振英當選後，曾約見曾鈺成，畀佢一個Offer加入政府，乃係做副司長！

　　我聽到即：「吓吓吓！」三聲大叫。

　　點解？打個假設比喻，若有朝一日小弟做咗廣播處處長，竟打電話畀「電台之神」俞琤，作出Offer：「喂，YT（佢綽號），咁吖，你唔好做商台，過嚟香港電台跟我吖，安排你做第二台總監，好嗎？」

　　你話YT會點？唔立即翻枱走人就奇，之前，必大力一拍：「阿Luke，你老幾？叫我跟你？點解唔返屋企先照下塊鏡？」

　　曾鈺成心目中，梁振英屬邊班馬，江湖內所有高人必知。喂，唔好玩啦！

曾智華

阿碌開咪

《鏗鏘集》爆料指上任特首梁振英當選後，曾約見曾鈺成邀他做副司長。資料圖片