【阿碌開咪】官威勁猛變「乞票鵪鶉」
上世紀七十年代加入政府時，久聞不少高官脾氣暴躁，官威嚇人，出巡時，前呼後擁，鄉親父老及下屬個個當乜乜司（其時官銜）神咁拜，因為真是手握大權也。
當年，名震一時的包括曹廣榮、楊啟彥，後來的曾蔭權也如是，下屬與佢哋開會，真係「震過貓王」，隨時「掟快佬」（File），一係向你掟，一係掟出會議室，然後加句——Rubbish！
不過，隨着社會開放及民主化，高官已由官威勁猛到變「乞票鵪鶉」（到立法會求票），有幸目睹整個變化，真有百般滋味在心頭。
今時今日，年輕人已絕少機會睇高官「表演鬧人」。近日局長們被上邊壓得透不過氣，要執行「硬任務」，也只是怒目而視，但用詞及態度仍窒下窒下，以免被議員及傳媒反咬。好嘞，若大家想「欣賞」乜叫「官威」，哈，終於有機會喇。
最近網上瘋傳一段昔日「惡官」葉劉淑儀接受《德國之聲》資深傳媒人Tim Sebastian訪問，嘩，但見佢恍似食咗一噸火藥，簡直當主持人係佢的無知下屬，胡亂炮轟，又喝又窒，令人看得儍了眼。觀眾必定會心諗：「究竟佢係咪食錯藥呢？」
至於位阿伯級資深訪問者Tim，可能亦算老謀深算，不停只提出問題去「刺激」葉劉，然後就等對方「失儀失態」。從西方角度看，擺明引葉劉踩入陷阱，導致公眾形象分大失。
昨晚見到政壇高人「大F」，當然拉佢問問：「F哥，有冇睇到葉劉條火爆訪問片呀？點解咁呢？話晒做咗咁多年民選議員，冇理由咁款得罪傳媒噃！」
「哈哈哈，阿碌，葉劉早早變咗精靈『政治動物』。凡出招，都準確計算㗎。第一，鬼佬訪問員及西方世界，並非佢選民及權力來源，可以不理！第二，呢個對西方傳媒的戰鬥格，國內幹部絕少。『表演』一次畀阿爺睇，如何省到鬼佬『立立令』，分分鐘有機會做下任特首或國家領導人㗎，知冇？」
曾智華
阿碌開咪
編按：原題為「儍仔，畀你睇咩？」
