【阿碌開咪】大和解對話媒人團
《名家合集》收錄名人文章，分享觀點，探討時事。
2020-06-11 11:51 HKT
字體大小
香港人，絕絕絕大部分有非常強烈的歸屬感，唔使立法，唔使逼，幾乎個個愛香港。
我點知？正是愛之深，痛之切。近一年，網上關於香港的意見排山倒海，無論用詞幾不堪入目，其實，心理學早指出，若你唔緊張這個城市，點會咁鬼上心上腦吖？就算移民海外的港人，你知我知，咪又係日日食廣東菜，群香港人，睇香港新聞，八香港消息過活？唔關心，豈會如此吖？
香港過去一年，撕裂得好勁，令人極冇癮。這個狀態，當然不能長期如此下去。所以，各個領域的有心人，都在思考——點搞番掂佢。
要搞，當然要由有權的做主動！邊個有權？北京及特區政府！因為佢哋掌控咗九成半大眾傳媒，整個政府機器，一切人力及財政資源，立法、行政、司法機關也在旗下，更可制訂公共政策，牌面「贏晒」兼具「壓倒性優勢」，只要稍稍思考點做可貼近民心，已能解決大部分問題，絕對唔使靠惡靠壓。
昨日，又有一位有心人（退役全國人大代表，前港府公職王）L哥約食飯。坐低，灌兩杯，開宗明義：「阿碌，香港咁落去好唔掂，一定要搞個『大和解對話團』！點開展好呢？」
「首先，千祈咪由政府搞！你知林鄭民望幾低啦。政府只可以默默支持，咪插手！」呢條問題，開正我嗰瓣。「其次，人物絕不可以畀人覺得太激進又或是舉手機器。必須在各自領域屬翹楚，具公信力及有長期為香港的記錄！」
「咁，你心目中有乜名單呢？」L哥好認真。
「嗱，以下人物，全部我認識或認知對香港非常有心，亦希望為大和解出一分力。你搵到佢哋出馬做中間人，『泛民/建制對話團』已成功一半。包括：李國能、陳南祿、羅燦、張堅庭、劉進圖、陳景祥、沈旭暉、徐立之、區家麟、張炳良、曾俊華、盛智文、鄭志剛、林大輝及袁國勇！」
講完，L哥摸摸下巴，若有所思。我擅長齋噏，落實，就要靠佢啦！
曾智華
阿碌開咪
（左起）張堅庭、陳南祿、李國能。（資料圖片）
最Hit
更多文章
