【阿碌開咪 】「古有明訓」在大館
《名家合集》收錄名人文章，分享觀點，探討時事。
2020-06-01 12:19 HKT
字體大小
幾個月的疫情，搞到全世界經濟大亂，香港當然如是。整個過程，出現汰弱留強現象。例如飲食業，我親身體會，限聚令慢慢解除，有質素的食肆已大部分重現盛況，肯定可以「收復失地」。
質素差的，唔好意思，就要被呢個浪捲走，望投資者重新裝備自己，再打入市場。記住，市場永遠公平，你有料，一定爆！
呢個浪，可能亦捲走海洋公園，因暴露其競爭弱勢，正是「醫番嘥藥費」。
呢段時期，不少非牟利機構，都在嗌救命，包括資助的、津貼的及慈善的，皆要打晒鑼搵收入，否則……唉，長貧難顧也。其中一隻「大笨象」，正是荷李活道「大館」，呢所古迹藝術館，改建時已多災多難，好彩由馬會在經濟上頂住（即係我有份啦），否則分分鐘早已爛尾！
好嘞，身水身汗起好嘞，除開幕時人人貪新鮮，排隊去參觀外，弊，近幾個月，立即企咗喺度，內裏的餐廳及茶館等，陷入艱苦經營。大館因要維持其品味及形象，不少受歡迎商業活動都唔做得，兼且入場是免費的，咁搞法，天咁高的行政費、保養費及管理費，點搞？
本來若果人流如鯽，遊客洶湧的話，內裏商戶當然不介意付出高昂租金，咁大館收入就有一定保證。
可惜，如今……當然，大館管理層不可就咁投降，個個月蝕到眼坦坦的。點搞呢？小弟參觀過一次，之後已無興趣再去第二三四次，亦冇衝動帶朋友去。
上周二老友飯聚，傾傾下傾到大館，老友問：「阿碌，有乜辦法疫後搞番生佢呢？」
灌兩杯後，隨口噏當秘笈：「首先，個操場夠晒大，唔好嘥，日日安排表演吸引人流啦。另外，裏面咁多古迹，一於請曾守過中央警署、域多利監獄而仍在世者（有幾多？）做導遊，仲有，請前一哥們介紹內邊的明訓牌匾——腦筋勝於槍彈及暴力（Brains Better Than Bullets And Brute Force）。」
曾智華
資料圖片
更多文章
