【阿碌開咪】最受歡迎全國政協

名家合集

《名家合集》收錄名人文章，分享觀點，探討時事。

2020-05-21 12:56 HKT

時評專欄

內容

傳媒人，一般不喜歡採訪人大代表或政協委員，因為十之八九只「緊跟中央路綫」，兼且絕大部分為上年紀人物，說話在香港人，尤其年輕人心目中，非常「離地」，聽幾分鐘已打呵欠。

除咗一位，正是星島新聞集團主席及全國政協常委何柱國。大家一見佢公開講嘢，就有種期待感、興奮感，因老何絕對有個人性格，經常話中有話，內藏不少幽默笑料，而佢乃百分百冷面笑匠，窒人時，木口木面，過癮又抵死。

上星期日，TVB新聞部照例有《講清講楚》。呢個節目，非常「建制」，其實冇乜好睇，但剛剛呢集唔同，因嘉賓乃何柱國，咁就要擔凳仔，開啤酒，剝花生，準時收看嘞。果然「不負眾望」！無論講《廿三條》立法，講港澳辦、中聯辦就香港事務發聲，講中學文憑試歷史科問題，講立法會選內會主席，雖然全部也是Line To Take，但就形容生鬼，句句有骨，你不必同意佢，但應贊成由佢口講出，再引用有趣事例，又係幾難辯駁者。

整個訪問，大家當然最開懷為見何主席講「大鴕鳥」林鄭月娥。資深傳媒人，不少覺得呢位阿姐「非常特別」，「能人所不能」。

例如，作為一個政治人物，接受訪問時，竟放三張自己的單人照在旁，頗為「自戀成狂」。

我四十年來，訪問過百計香港各界精英，從未見過一位如此「超級自我中心」（Super Egocentric）人物，真箇要百分之一千活在自己世界，才有這種「情懷」，令人「打晒冷震」。

一般建制派人物，都不會公開得罪特首，所以談及這位爭議性人物，必定溫溫吞吞。老何呢？真係句句到肉，正到飛起，包括：我對佢好有意見；搞到社會如此大撕裂竟當冇事發生；用納稅人錢買番少少下跌民望……

最攞命，批評完，竟話：「我唔敢冒犯佢，佢已經喺背脊插咗我好多刀，一刀刀斬落嚟！」

傳媒人訪問老何，真興奮死？

曾智華

星島新聞集團主席、全國政協常委何柱國。資料圖片