【阿碌開咪】「點」立法會議員
《名家合集》收錄名人文章，分享觀點，探討時事。
2020-05-20 12:06 HKT
字體大小
海洋公園急需緊急撥款「吊命」，今日將向立法會財委會申請五十四億元。當中三十億元償還商業貸款，其餘資助公園未來一年營運。若撥款不獲批，政府揚言，公園下個月便會倒閉。
到立法會「攞錢」這個「遊戲」，任何議員及傳媒皆清楚，高官次次都會大耍「過咗海就是神仙」、「洗濕咗個頭」或「米已成炊」策略。
通常政府想推任何大Project，例如高鐵、港珠澳大橋、迪士尼樂園……都會先描繪一個美麗遠景去游說議員、傳媒及市民。當中必用招數為：一、可以為香港帶來XX億元經濟效益；二、可以製造X千或X萬個就業機會，養活X百個家庭；三、興建費用只需XX億元，投資不大，但回報極深 ；四、若果唔做，香港將會失去以上三項，並被競爭對手過頭！
以上四點，為令議員、傳媒及市民入信，當然條數作到有咁靚得咁靚，總之唔做就老襯！請議員立即投票讓項目上馬！
既然係「作」數，當然以「達目的為本」，包括經濟效益作到天文數字咁高，就業機會喊大一倍，工程費用縮到細細。
老友，單睇高鐵、港珠澳大橋及迪士尼樂園，大家就知，「過咗海」之後，原來香港踩咗落個氹，唔知幾時（又或根本全無機會）才回本！不止，更分分鐘要長期輸血「救亡」，比少啲都唔得，否則收檔！
小弟過去幾十年，見盡議員被政府「老點」N咁多次，幾乎次次中招，因大部分項目，皆包裝到華麗非常，加上多有政治色彩，建制派議員唔投票贊成唔掂也。
呢呢，今日財務委員會召開，政府又要「點」議員喇，除「恐嚇」話海洋公園這個「香港人集體回憶」可能執笠外（應執點解唔執？），更會有二千人失業，七千五百隻動物權益受損。
但是，政府會否透露唔做海洋公園又可慳番幾多錢？若塊地用來改建醫院、護老院、公屋……又可製造幾多千（或上萬）職位呢？當然唔提啦！（曾智華）
全文刊於《星島日報》「阿碌開咪」
資料圖片
更多文章
