【阿碌開咪】陰陰笑的地產商

名家合集

《名家合集》收錄名人文章，分享觀點，探討時事。

2020-05-14 12:51 HKT

時評專欄

內容

　　一度非常「意氣風發」的富豪潘蘇通，近兩年運程突轉，旗下高銀金融繼去年六月啟德商業地王撻訂後，周一再公布七十點四億元出售啟德住宅用地，蝕到出汁，估值較兩年前大跌超過兩成，預期將會虧損二十五點七一億元。

　　買家身分未被披露，有點神秘，為離岸註冊公司Top Family Group Limited。

　　Top Family？會否正是香港的最頂級家族呢？這個謎，相信很快會揭曉！

　　這個交易，令我諗起四年前，當時潘蘇通真係「嘭嘭聲」咁勁，除屬馬場大馬主，買馬出手令人非常側目，隨時千萬元計唔眨眼！

　　投地方面出價，更令傳統發展商窒一窒。試過有位香港地產界名人拉我講：「阿碌，老潘咁豪，我當然唔會同佢鬥癲啦。我哋長期在香港搞地產，幾十年來乜風浪都見過，所以，計算一定要精確又安全，絕不冒險。老潘來自內地，另一套價值觀。不過，騎騎騎，出咁重手掃埋咁多幅地，一定以為香港地皮，只升不跌啦。唔……祝佢順風順水！」

　　潘蘇通當時真犀利，掃入何文田兩幅地王（常盛街、佛光街），另又有兩幅啟德地王，風光一時無兩，次次地產版皆形容佢「鍊贏」土炮發展商（其實出多點就可以「贏」，可能「老襯價」喎）。

　　人的運程，千變萬化到你唔信。對的，若香港的地皮，不斷上升，咁，老潘一定可以向銀行按天文數字的錢，再投更多地皮。不過，佢有冇諗過會「倒轉玩」呢？

　　結果，一個轉勢，二○一八年開始，其財務情況，已不時出現經濟版及地產版，包括抵押高銀金融國際中心給長實，以八厘年息借入一百零二億元的貸款，每月單還息已幾千萬元！繼而啟德地皮撻訂、佛光街地皮因地盤沉降停工、常盛街樓盤「傲玟」銷情不理想。如此情況下，想賣須限期完工啟德住宅地皮，唔畀人狂鋤價就奇矣。

　　究竟Top Family是否昔日對我陰陰笑的發展商呢？

曾智華

資料圖片