孫慧雪變「女版古天樂」海量公仔塞爆三個倉 不愛名牌愛限量版BE@RBRICK丨星級品味

如果要講出在娛樂圈對收藏玩具的表表者，首選一定是古天樂，本身是超級科幻電影迷的古天樂，一直以收藏電影模型玩具為樂，甚至耗資逾千萬港元創建私人玩具王國，珍藏多件絕版1:1恍如真人的模型，除了黑武士，還有蜘蛛俠、蝙蝠俠、鐵甲奇俠、未來戰士等限量版，實在令人嘆為觀止！想不到孫慧雪原來都是收藏玩具愛好者，雖然她的收藏並不是件件都屬貴價貨，但每一樣收藏背後都有故事！

相關閱讀：名媛女星追捧「平價版Hermès」Loro Piana！蔡嘉欣首推高CP值L19丨星級品味

孫慧雪收藏玩具件件都有故事！

孫慧雪珍藏充滿童年回憶

「宅男女神」之稱的孫慧雪，原來從小已經喜歡畫畫，長大後更加是漫畫迷兼玩具迷，孫慧雪日前應《星島頭條》的邀請，分享關於精品方面的收藏！孫慧雪當日在拎了一個My Melody的頭型拖喼，喼內裝滿了不少SANRIO的Little Twin Stars、Hello Kitty、THE VAUDEVILLE DUO和My Melody等等精品，幾乎擺滿了一張四人枱！孫慧雪笑稱這些珍藏只是的冰山一角，不過已經充滿了她的童年回憶。

孫慧雪拎着最愛的Little Twin Stars笑說：「所有嘢都同我童年有關，以前好羨慕同學生用SANRIO啲文具，我細個連玩具都冇，嫲嫲唔畀我玩，就算係人哋送，佢都會好愛惜咁包實晒唔畀我玩，就算玩啲嘢都係好日常，好以喺佢摘菜我就喺側邊扮小販，玩啲屋企有嘅嘢，好似做戲一樣，所以大個咗咪去考訓練班，而家大個就會買返啲玩具嚟安慰自已，呢啲係細個冇嘅嘢，睇返係彌補啲，我儲嗰啲都係我成長嘅年代。」

孫慧雪與老公租三個倉放玩具

孫慧雪的老公羅天彥（Edwin Lo）外型Man爆，又有誰會想到原來與太太一樣，都喜愛收藏玩具，孫慧雪笑說：「佢成日都話冇人睇得出佢係咁，其實佢內心係住咗個迪士尼，我哋一得閒就去行『現時點』猛咁睇公仔，佢又會陪我去SANRIO睇嘢，就算去日本，都係行秋葉原同埋玩具街睇啲古老玩具。」孫慧雪稱向來收藏是按自己喜好，反而老公比較多喜好，她說：「有啲人話儲KAWS、BE@RBRICK可能會用嚟炒賣，又或者買啲好值錢，不過我老公話細個嗰陣喺搭車見到KAWS係畫啲噴畫，已經開始儲到而家，而唔係啲人話好值錢用嚟炒，佢真好鍾意，連BE@RBRICK都係儲咗好多年。我哋租咗3個迷你倉，屋企有一間玩具房，但係連廳都擺滿咗，咁啱我哋都鍾意，嗰陣佢話同我夾，大家都係鍾意去主題樂園玩，而且又勁鍾意啲公仔！」

孫慧雪開始儲玩具成長背景有關

不過孫慧雪開始儲玩具的時間比老公還要遲，原來與成長背景有關，她說：「我諗應該係自己有能力買嘢嘅時候，大約係20歲左右，因為10幾歲嗰陣，我記得買咗個PC狗鎖匙扣，係28蚊，當時係儲零用錢自己買，點知返去畀嫲嫲鬧我點解有錢就買埋啲無謂嘢，又唔儲起啲錢，搞到我好驚，唔夠膽再買。到大個咗做嘢辛苦，我自己又好慳，唔會買啲名牌，咪去精品店買公仔獎勵自己，嗰陣覺得我又唔係使咗好多錢，但係又可以令自己開心。第一個買嘅公仔係55蚊嘅HELLO KITTY，喺北角健康商場一間精品店，第二個買嘅係SANRIO嘅精品，係喺天后地鐵站隔離一間精品店，跟住越買越多。」

講到其中一個最愛的收藏，相信是兩個2000%大的BE@RBRICK，去年適逢是迪士尼100周年，有商場與玩具品牌推出100隻獨一無二2000%迪士尼角色BE@RBRICK模型，孫慧雪當時獲邀出席活動並入紙抽籤購買，最後成功以5位數字買入，孫慧雪笑說：「嗰次我哋帶哥哥去睇展覽，哥哥先係見到《小木偶》入面嘅吉明尼小蟋蟀，寫咗老公同細佬個名，佢見到有少少失望，但係好乖冇出聲，因為佢覺得要錫個細佬。我同爸爸都知佢失望，但係冇話佢知，去到《玩轉極樂園》(Coco) 嘅米哥（Miguel）見到自己同媽媽個名，個樣係function 唔到，佢覺得好驚喜，可能以為爸爸媽媽有咗細佬就唔錫我，點知原來係同媽媽有一隻。」

孫慧雪為兒子買心頭好

孫慧雪笑說：「連順豐送貨嗰個人話好驚整爛，呢兩個BE@RBRICK而家擺咗喺屋企，一直都未拆，因為細仔而家學行，好鍾意撞埋啲嘢度，我哋好驚佢撞花，所以咪包實晒佢。呢個係留番畀我哋兩個仔，哥哥佢好鍾意《Remember Me》呢首歌，所以我咪諗不如媽咪送份禮物畀佢，等佢大個都會Remember Me。呢個2000%全球係得一隻，真係好值得。」除了這兩個2000%大的BE@RBRICK外，孫慧雪稱老公亦有不少收藏：「如果1000%我諗佢都有50隻左右，佢有埋Beatles特別版，試過有人出價出到20幾萬，同我老公講想買佢啲BE@RBRICK，好似係啲三眼米奇同埋啲蜜瓜，嗰啲係難啲，但係佢都話唔買，因為呢啲係佢嘅心頭好。佢仲有啲奈良美智嘅畫，有陣話佢買得太多，佢就話保值。」

孫慧雪最愛還是《飄流教室》

不過對孫慧雪而言，最愛還是《飄流教室》，當中亦代表着夫婦二人，孫慧雪說：「我好鍾意聞書味，所以細個好鍾意睇漫畫，尤其係恐怖漫畫，《飄流教室》嘅誠仔係謀圖一雄嘅漫畫裡面，其中一個好標誌嘅人物，唔知點解，我自己見到覺得好得意。我老公知道我好鍾意，所以咪拎咗嚟求婚，變咗更加有意義。跟住我老公一見到誠仔嘅公仔就會買，而家大約儲咗50幾隻左右，喺日本出嘅誠仔基本上都有晒，只係爭一隻，嗰個係最大嘅一隻，係舊版嘅公仔。」孫慧雪亦曾拍開箱片，分享買這類公仔要注意的地方：「唔好以為未開箱一定好，反而開咗箱之後，隻公仔冇咁易發霉，好多人儲kaws，好貴炒價買，好多人搵未開箱，有個風險，未開箱嗰個可能貴好多，但係保存會冇咁好，開咗箱係平啲，但係保存會好啲。」

其他文章：

男神潮牌童裝大比併！陳冠希聯乘The North Face設計外套 余文樂與Converse合作出鞋仔丨星級品味

七間星級食府推介！歌神排隊都食米芝蓮泰式船麵 劉嘉玲梁朝偉飯堂成名流至愛丨星級品味

金像獎2024群星穿搭逐件睇！劉嘉玲金龍蝦頸飾價值8萬 出爐影后余香凝滿手Tiffany鑽飾丨星級品味

「職場女王」Son姐古董餐具傳承三代 紫砂茶壺手工精細極珍貴丨星級品味

名音樂人王雙駿靚帽珍藏全公開！有頂全球獨有 為陳奕迅火燒帽最有味道丨星級品味

----------------------

《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

緊貼最新最快新聞資訊，請立即下載星島頭條App：https://bit.ly/3Q29Vow

由即日起至5月27日，參加《星島申訴王》「港人置業意向」問卷調查，即有機會贏走香港迪士尼樂園門票2張或SMARTECH智能煮食鍋！ https://bit.ly/3V7t3o7