黃秉華 - 智能手機過時鴻海轉攻電動車 | 創科時代

更新時間：00:10 2023-06-08
發佈時間：00:10 2023-06-08

鴻海靠代工蘋果起家，最近表示轉攻市場，開發電動汽車產業，爭取更高利潤回報，原來幫蘋果公司砌iPhone好處只係收入穩定，但係無肉食，得個做字咁話。

「去風險」是熱門詞，源於歐美發覺本國的消費品、生產材料和零部件太過依賴中國，長期下去會出現風險，因此及早部署多元化貿易，投資東亞其他國家，希望做生意不止中國一家。明白，雞蛋全放在一個籃係大忌，之不過，有本事先可以講去風險，鴻海有乜本事？

鴻海同華為一樣，不是轉行做汽車生產商，而係為該電動車提供技術方案。華為是專攻電動車操作系統，鴻海則研發電動汽車半導體，而且早於四年前布局。行內人就有少少潑冷水，事關汽車半導體由美國、日本企業話事，美日十大企業佔汽車半導體產品四分三。再者，現時市場已呈白熱化，鴻海想發力迎頭趕上，代價和成本高昂，鴻海需要有大量燒錢的決心。

鴻海好似好威水，其實表面風光，雖然七成iPhone出自其代工，但係利潤微薄到無人信︰公司營業收入凈利潤率連續6年低至在1%至2%，刻薄講一句，賣鹹脆花生好賺過佢。

代工生產商由於搵錢艱難，主要業務又並非以新技術為本，所以不會預留太多資源在研發方面，鴻海不同華為這類技術型公司，華為2022年投資研發是其營收25%，研發員工超過11萬。

鴻海轉型不是完全去風險，你可說是「冒風險」，但還是下此決心，反映智能手機時代已過。生意難做，無技術含金量更難做，世界進步，今時今日你有無見到人靠揼石仔養家？

文：黃秉華

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ