威院地盤工中暑亡│死者要求工友買水解渴不果 舅仔激動控訴安全主任「佢有異常仲要留喺工地」
發佈時間：12:27 2025-05-23 HKT
前日（21日）下午3時許，酷熱天氣警告生效期間，沙田銀城街威爾斯親王醫院重建地盤，42歲男工張文禮懷疑中暑昏迷，送院搶救不治。今日其舅仔黃先生到殮房認屍後，質疑出事前地盤安全主任的做法。他激動哭訴「當日地盤主管發現佢有異常，叫咗安全主任嚟睇佢，之後剩係畀咗支寶礦力佢，要佢繼續留喺現場，過咗一段時間佢就神志不清，最後死亡。」黃生指從他姐夫（死者）手機的群組對話顯示，出事當日早上8時許，他已不斷要求工友協助他買水，坦言自己「死吓死吓」，發出求救訊號，顯示地盤供水不足，最後令他陷入絕境慘死。
相關新聞：酷熱天氣警告生效 沙田威爾斯醫院地盤男工疑中暑不治
相關新聞：威院地盤工中暑亡｜家屬質疑失救 老父泣訴愛子生前遭剝削 被迫隱瞞工傷「爛腳都返工」
黃先生表示，昨日大判及二判曾交代他們認知的情況，本周三（21日）食飯後，事發前工地主管發現死者有異常，除衫周圍走，主管見到咁就叫地盤安全主任嚟觀察佢，問咗佢有冇唔舒服等，後來畀咗支寶礦力佢，然後就由得佢繼續留喺現場。直至過咗一段時間，死者神志不清，亂跑亂跳，衝入地盤禁區，然後死亡....」
黃聽完管方講述的過程，坦言心生疑問，「當日係酷熱天氣警告生效，食完飯，下午開工時現場主管發現佢有異常，我好奇怪，地盤咁緊張工作，連主管認為有問題，要叫安全主任嚟，證明真係有問題，係求救訊號，點解只係畀咗支寶礦力佢，就繼續叫佢留喺現場，真係好有疑問。」
地盤工疑中暑身亡:
黃生指「烈日當空情況下，有神志不清，其實已經係中暑先兆，理論上點解唔直接同佢去休息室？究竟有冇進行降溫工作?又冇風扇畀佢，又冇水畀佢，成個過程我覺得匪夷所思，我唔明點樣為之一個救援，在有求救訊號的情況下，你哋放棄黃金救援機會，任由佢喺工地繼續暴曬，到佢嚴重咗啦，再容許佢蹦蹦跳跳去到工地的禁區，最後死亡。」
「我有幾個疑問，究竟大判有否疏忽，有否責任需要再進一步去協助佢？其實我姐夫可以唔使死。昨日勞工處講到其實做所有防暑措施，我好想問，防暑措施要嚟做乜，一個中暑嘅人，已經有中暑先兆，作出求救訊號，但係佢剩係得一支寶礦力情況下，乜嘢防暑設施都冇享用到，你冇拉佢去休息室，冇畀風扇佢吹，你冇同佢量度體溫，仲要要求佢戴住工地帽，成個過程係咪匪夷所思？你係冇諗住救一個中暑或準備中暑嘅人。」
黃先生檢視過姐夫的電話，在群組對話中，顯示他由早上8時開工，已經叫救命話冇水飲，叫同事幫他買水，而同事經半小時回覆他指「汽水機的飲品已賣晒，冇得撳了」。此時黃生情緒激動哭訴「你可唔可以理解一個人頸渴冇水，烈日當空曬住，然後向工友求救，你哋係冇作為！我姐夫最尾求救話冇水飲，你哋做咗啲乜嘢？勞工處話佢有水?有休息室?有雨傘有風扇?其實係乜都冇用過就死咗！你哋做呢啲嘢係咪擺設嚟？你哋有冇去執行過?我覺得佢係唔使死！如果你哋係有做足你哋所講嘅嘢！」
他又控訴，「其實威爾斯醫院就在旁邊，點解佢入到醫院係僵硬而死，我姐夫隻手係拳頭緊握抽搐僵硬，到底大判係咪真係有疏忽，點解白白眼見一條生命流失，成個過程應該畀個答案畀家屬。我好希望大判解釋到畀家屬聽，點解我姐夫當日用咗25分鐘叫工友買嘢飲畀佢?到中午出現異常，至3點半僵硬而死呢?」他希望大判可早日給予他們家屬一個交代。
