威院地盘工中暑亡│死者要求工友买水解渴不果 舅仔激动控诉安全主任「佢有异常仲要留喺工地」
发布时间：12:27 2025-05-23 HKT
前日（21日）下午3时许，酷热天气警告生效期间，沙田银城街威尔斯亲王医院重建地盘，42岁男工张文礼怀疑中暑昏迷，送院抢救不治。今日其舅仔黄先生到殓房认尸后，质疑出事前地盘安全主任的做法。他激动哭诉「当日地盘主管发现佢有异常，叫咗安全主任嚟睇佢，之后剩系畀咗支宝矿力佢，要佢继续留喺现场，过咗一段时间佢就神志不清，最后死亡。」黄生指从他姐夫（死者）手机的群组对话显示，出事当日早上8时许，他已不断要求工友协助他买水，坦言自己「死吓死吓」，发出求救讯号，显示地盘供水不足，最后令他陷入绝境惨死。
相关新闻：酷热天气警告生效 沙田威尔斯医院地盘男工疑中暑不治
相关新闻：威院地盘工中暑亡｜家属质疑失救 老父泣诉爱子生前遭剥削 被迫隐瞒工伤「烂脚都返工」
黄先生表示，昨日大判及二判曾交代他们认知的情况，本周三（21日）食饭后，事发前工地主管发现死者有异常，除衫周围走，主管见到咁就叫地盘安全主任嚟观察佢，问咗佢有冇唔舒服等，后来畀咗支宝矿力佢，然后就由得佢继续留喺现场。直至过咗一段时间，死者神志不清，乱跑乱跳，冲入地盘禁区，然后死亡....」
黄听完管方讲述的过程，坦言心生疑问，「当日系酷热天气警告生效，食完饭，下午开工时现场主管发现佢有异常，我好奇怪，地盘咁紧张工作，连主管认为有问题，要叫安全主任嚟，证明真系有问题，系求救讯号，点解只系畀咗支宝矿力佢，就继续叫佢留喺现场，真系好有疑问。」
地盘工疑中暑身亡:
黄生指「烈日当空情况下，有神志不清，其实已经系中暑先兆，理论上点解唔直接同佢去休息室？究竟有冇进行降温工作?又冇风扇畀佢，又冇水畀佢，成个过程我觉得匪夷所思，我唔明点样为之一个救援，在有求救讯号的情况下，你哋放弃黄金救援机会，任由佢喺工地继续暴晒，到佢严重咗啦，再容许佢蹦蹦跳跳去到工地的禁区，最后死亡。」
「我有几个疑问，究竟大判有否疏忽，有否责任需要再进一步去协助佢？其实我姐夫可以唔使死。昨日劳工处讲到其实做所有防暑措施，我好想问，防暑措施要嚟做乜，一个中暑嘅人，已经有中暑先兆，作出求救讯号，但系佢剩系得一支宝矿力情况下，乜嘢防暑设施都冇享用到，你冇拉佢去休息室，冇畀风扇佢吹，你冇同佢量度体温，仲要要求佢戴住工地帽，成个过程系咪匪夷所思？你系冇谂住救一个中暑或准备中暑嘅人。」
黄先生检视过姐夫的电话，在群组对话中，显示他由早上8时开工，已经叫救命话冇水饮，叫同事帮他买水，而同事经半小时回复他指「汽水机的饮品已卖晒，冇得揿了」。此时黄生情绪激动哭诉「你可唔可以理解一个人颈渴冇水，烈日当空晒住，然后向工友求救，你哋系冇作为！我姐夫最尾求救话冇水饮，你哋做咗啲乜嘢？劳工处话佢有水?有休息室?有雨伞有风扇?其实系乜都冇用过就死咗！你哋做呢啲嘢系咪摆设嚟？你哋有冇去执行过?我觉得佢系唔使死！如果你哋系有做足你哋所讲嘅嘢！」
他又控诉，「其实威尔斯医院就在旁边，点解佢入到医院系僵硬而死，我姐夫只手系拳头紧握抽搐僵硬，到底大判系咪真系有疏忽，点解白白眼见一条生命流失，成个过程应该畀个答案畀家属。我好希望大判解释到畀家属听，点解我姐夫当日用咗25分钟叫工友买嘢饮畀佢?到中午出现异常，至3点半僵硬而死呢?」他希望大判可早日给予他们家属一个交代。
