郭志仁 - 曼聯男友vs利物浦女友 | 九宮格
發佈時間：02:00 2025-08-01 HKT
利物浦對AC米蘭友誼賽，壞男群組成員M先生，於IG貼出限時動態，地點標記「啟德」，Hashtag「#死敵同場」。兄弟狂洗版：「你個曼聯死忠，點解去睇死敵利物浦！轉會呀？」
M與女友L拍拖兩年，戀愛日常就像英超宿敵，M是曼聯鐵粉，每季紅魔新戰衣例必預購，連咖啡杯都繡着球隊徽章；女友L則是利物浦狂熱信徒，曾遠赴晏菲路球場見證紅軍捧盃。每逢「雙紅會」，家中變成小型球場，硝煙瀰漫：
男友：「利物浦永遠攞唔到聯賽錦標！」
女友：「曼聯淨係識燒錢買水貨！」
有時爭論得面紅耳赤，冷戰到入睡。
這次利物浦再度訪港，女友一早搶票，堅持要M陪同。M半開玩笑：「同我去？我要着曼聯衫入場！」見女友一臉不悅，終於妥協：「講笑，但我一定唔會幫你揮Y.N.W.A.旗！」Y.N.W.A.即是You'll Never Walk Alone，每逢球賽，利物浦球迷都會高舉這面旗幟，齊唱隊歌，氣氛感人。
比賽當晚，M先生甘願當貼心助手，買汽水拎薯條，看着女友興奮得又叫又跳，但M還是堅守底線，絕不為紅軍歡呼。全場90分鐘，男友一邊喝着啤酒，一邊默默為對手AC米蘭打氣，偶爾回覆其他女生短訊。結果如M所願，AC米蘭獲勝，他壓抑內心的暗爽，女友則自嘲一笑：「友誼賽啫，唔使認真！」
賽後，女友偷偷把利物浦圍巾掛在男友車頭，拍照上載IG，同樣標註「#死敵同場」。還將利物浦球星明信片放在男友車廂，記錄比賽日期，寫上「多謝你咁錫我！」M先生望着明信片，一陣甜蜜，但看到利物浦球員笑臉，立即打了個冷震。
“Walk on, walk on. With hope in your heart. And you'll never walk alone.” Gerry and the Pacemakers - You'll Never Walk Alone
郭志仁
