《中年2》變歌手翻生平台 54歲鄭梓浩唔怕Out 被插反骨大反擊《造星3》黃劍文

頭條日報-娛樂

更新時間：00:00 2023-07-06 HKT
發佈時間：00:00 2023-07-06 HKT

TVB節目《中年好聲音》叫好叫座，奪冠的周吉佩亦鹹魚翻生，開音樂教室及全職做歌手。節目變成陳年過氣歌手翻生平台，所以《中年2》吸引大量行內人參加，包括39歲，2020年《全民造星III》第9名的黃劍文（Kimman）及54歲前新藝寶歌手鄭梓浩（Brian）。Kimman坦言13年前曾因母親離世差啲睇唔開：「既然執返條命，點解唔做返啲轟烈嘅嘢，令人生更加精彩？」至於Brian就好有抱負，重返香港樂壇都係靠呢舖。　
採訪：方騫平
場地：The Stadium（黃劍文）、Iza居酒屋（鄭梓浩）

並非「樂壇白紙」的黃劍文及鄭梓浩，今次參與《中年2》海選，分別獲老友周慧敏及黎瑞恩支持。Kimman笑說：「我見『歌神』張學友都係咪不離手，就知佢有幾鍾意唱歌，喺佢身上得到鼓勵，鍾意做嘅嘢唔好放棄。」他承認《造星III》成績唔理想，今次參賽想畀機會自己做好啲，等更多觀眾認識自己。
Kimman被鬧咪再發明星夢

39歲的黃劍文屢敗屢戰唔怕被網民批評，他有感而發：「網上有千幾個留言，大部份係支持我，亦有抨擊我參加《中年2》好反骨，又叫我『算把啦，咪發明星夢』、『唔知佢係乜水』，其實我參加過多個比賽，包括TVB第1屆《超級巨星》，因為唔聽話慶功時飲到聲沙，最後30強止步。其實呢個世界大把人講嘢，好多不負責任，咁聽得邊個呢？定應該聆聽自己個心想點？」

Kimman強調唔係發明星夢，只係鍾意做音樂，相信音樂的力量，亦跟他的經歷有關。單親家庭成長的他，26歲時經歷母親自殺的沉重打擊，於媽媽離世後5天，一度悲痛欲絕行出露台尋死，幸而腦海閃出需要他照顧的公公及婆婆，即打消念頭，更從黑暗中振作，令他更相信音樂力量，「Busking咗4年，試過有人喊住上前多謝及擁抱我，話我啲歌感動到佢，甚至打消咗傷害自己的念頭，哪怕只係感動到一個人，影響到一個人生命，我覺得已經足夠。既然當年執返條命，好多嘢都賺咗，點解唔做返啲轟烈嘢，放手博一舖令人生精彩啲？」

熱愛唱歌的黃劍文以獨立歌手身份自資出歌，新歌《餞別酒》紀念已故舅父。他承認3年疫情令他入不敷支，生活處於「吊鹽水」狀態，1年做兩首歌，每年動輒花12萬，再賺唔到錢，捱多兩年就耗盡積蓄，「做到冇晒錢我會認輸，但唔會放棄音樂，仍然會繼續唱歌。其實冇咗錢唔緊要，當係投資喺自己身上啫，可想而知我幾愛音樂，因為音樂係我人生一部份，可紓緩壓力。」
鄭梓浩入行32年再戰樂壇

另外，鄭梓浩曾於1991年出道做歌手，亦出過兩張唱片，首本名曲有《一對妒忌的心》及《孤單的我》。定居紐西蘭超過21年，一直與家人經營西餐、甜品、中菜及髮廊等生意，因為唱歌癮發作，7年前撇低妻兒，簽公司打算重新出發，可惜事與願違，今次參加《中年2》希望再戰樂壇，「我唔怕俾人話out，只要唱返啲啱年紀嘅歌就得，大家口味唔同，就算o依家樂壇多新人都唔會影響到自己。」對於自己的學生亦有參賽，Brian唔會有壓力，因為學無前後，達者為先。