手術後學懂自我減壓何依婷做食物鏈最低層

頭條日報-娛樂

更新時間：00:00 2022-07-07 HKT
發佈時間：00:00 2022-07-07 HKT

TVB以劇集《回歸光影頌》系列慶回歸，出動埋視帝、視后及上位姐仔、小生演出，何依婷於今晚播出的單元劇《神奇的燈泡》中飾演仙女，為失意的周嘉洛、江嘉敏燃點希望。對於被捧「名冊」中榜上有名，何依婷笑言：「我個仙女角色係帶出被捧嘅同事，我只係食物鏈最低層！」
採訪：方騫平

由陳維冠監製嘅單元劇《神奇的燈泡》由周嘉洛、江嘉敏及鄭子誠飾演前路茫茫，各有抱負嘅都市人，由手持「神奇燈泡」嘅仙女何依婷帶來希望。由於仙女要從天而降，拍攝時何依婷企喺一盞街燈咁高嘅升降台，因為降落時嘅離心力，嚇到佢腳仔軟，唔敢向下望。
監製操刀學到嘢

被指受力捧，何依婷謙稱咁啱啫，「劇中由我帶出故事人物，所以由我去帶出被捧嘅同事！」她稱此劇重點係監製親自落場操刀，今次如同跟大前輩學嘢，對演戲重新認識。

何依婷近日除咗主持新節目《魔法伽利略》外，又拍新劇《美麗戰場》，提到數月前曾秘密入院接受割除良性腫瘤手術，問到工作量增多，身體能否應付？她表示病後反而學會放輕鬆：「o依家心態唔同咗，冇以前咁大壓力，唔會因做唔到100分而唔開心，明白到只要付出努力就ok！其實做人最緊要係熱愛生活，取得身心健康平衡，因為睇通咗，o依家開心咗好多。」