芒果糯米飯｜將成為非物質文化遺產？推薦本地三款必試芒果糯米飯
發佈時間：14:24 2022-05-02 HKT
芒果糯米飯將會成為非物質文化遺產？事緣上星期，泰國 rapper 歌手 Milli 在美國最大型音樂節 Coachella Festival 表演時，竟然邊 rap 邊食芒果糯米飯，仲問台下樂迷喜唔喜歡食呢個咁土炮又出名的泰國平民小食。表演一完即引來極大迴響，呢幾日曼谷的街頭小食店，買芒果糯米飯的市民大排長龍，有小店更日賣 400 碟。連泰國總理巴育睇完 Milli 表演後，都有意申請芒果糯米飯成為聯合國教科文組織非物質文化遺產。去泰國食芒果糯米飯可能仲要等多陣，但香港一樣有唔少正宗、CP 值高又抵食的芒果糯米飯。
After You Dessert Café
After You 係唔少港人去泰國必食的甜品店，去年已在香港搞過 pop-up，今年年頭終於在香港開海外分店，選址銅鑼灣。主打當然係最爆紅的芒果糯米飯刨冰，topping 淋上忌廉奶醬同炒綠豆，配上芒果味冰底，刨冰亦夠綿密。食到最後有椰汁糯米飯。份量十足，三人 share 冇問題！
地址：銅鑼灣登龍街 52 號景隆商業大廈地舖
泰灜 Thai In
佐敦人氣泰菜餐廳，有自家製芒果糯米飯蛋糕。兩層椰汁糯米飯用料十足，中間夾住大堆頭芒果，外層亦舖滿芒果肉粒。每吃一口都食到新鮮芒果，最適合在 3 至 5 月芒果當造季食。Topping 一樣有新鮮芒果，一片片砌成玫瑰花形狀，打卡一流。椰汁一樣都係自家製，椰香味濃郁。
地址：佐敦吳松街141號
泰發泰國餐廳
要食最地道泰菜，九龍城一定係不二之選，推介泰發。餐廳由老闆娘到樓面侍應都係泰國人，未食嘢已感受到濃濃泰味。其芒果糯米飯一樣係自家製，按不同月份嚴選最靚芒果，保證果肉鮮甜又多汁。糯米飯更是 5 色飯粒，賣相又靚口感極煙韌。
地址：九龍城城南道 8 號東昇閣地下
立即下載 | 全新《星島頭條》APP : https://bit.ly/3yLrgYZ
更多第5波疫情資訊，請到以下專頁瀏覽 按此
