《反起跑》演校長過足癮袁富華心願做齊鏡仔老竇

頭條日報-娛樂

更新時間：00:00 2022-03-31 HKT
發佈時間：00:00 2022-03-31 HKT

袁富華（Ben哥）最近在ViuTV劇《反起跑線聯盟》演百厭「孔校長」，講到劇中「學生」，他大讚可愛又專業，不過未有改變他跟女友過二人世界的想法，但講到演戲，他就好享受當爸爸。在ViuTV新劇《季前賽》演Edan（呂爵安）@MIRROR爸爸的他，更聲言心願是做齊12個鏡仔老竇。採訪：杜杜

Ben哥謂到現在也很懷念小演員齊大叫「孔校長」的情景，因劇中童星真的太可愛，而且幾歲人仔表現相當專業，令他好感動，「演肥仔同娟姐個囝囝嘅小演員，有場畢業戲小朋友要逐個上台，佢排到尾二，上到台你估佢隻手充滿啲咩？係鼻嘅分泌物，哈哈！其實佢本身好易鼻敏感，但佢知拍緊嘢，咪唔出聲一路搵隻手抹，你就見到佢嘅專業態度，呢樣嘢係令我好感動。」
現實無意做老竇

講起一班小朋友，這個「孔校長」就勁冧，但跟圈外女友拍拖多年的他，未有動搖不當爸爸的想法，「唔好啦啩！冇咁嘅精力湊，我有個朋友佢生兩個細路相隔4年，佢都話冇力湊，更何況我呢啲年紀，都係二人世界算啦！兩個夠晒數，哈哈！」

現實不想做老竇，但演戲Ben哥就唔怕多，仲想做齊MIRROR 12子的爸爸，因為他繼在ViuTV劇《無限斜棟有限公司》做過Ian爸爸後，最近在《季前賽》又做Edan爸爸，他大讚這個「仔」夠聰明，「其實我唔係第一次同佢合作，《娛樂風雲》雖然冇乜對手戲，但係同佢都傾過偈，有場戲我同佢分享，講咗幾句，佢就識得做跟住嗰場戲，所以佢哋成功唔係靠運氣囉！我有個心願，就係做齊鏡仔嘅爸爸，哈哈！不過隨緣，唔好咁多野心！」