Kelly Online: 水務署教「推人落山」？滴惜仔宣傳慳水反惹爭議

港聞

更新時間：17:57 2018-12-13 HKT
發佈時間：17:13 2018-12-13 HKT

上圖為網絡熱門meme，源自《飄零燕》。

最近消防處「任何仁」一身藍色戰衣出哂位，其他政府宣傳物如環保署嘅「大嘥鬼」都好受歡迎。但係水務署的吉祥物「滴惜仔」雖然都係藍色皮膚又宣傳慳水惜食，但似乎「立心不良」，竟然公然「殺人」。

琴晚天寒地凍，相信大家都鍾意沖返個熱水涼暖身。「滴惜仔」就趁機會宣傳慳水，話：「天氣冷沖個熱水浴，驅走寒意係無問題嘅，不過沖得太耐，唔止嘥水，仲有機會過份沖走皮膚嘅油脂變咗週身痕，你話幾咁唔好呢。」而配圖坐住輪椅嘅「滴惜朋友」仲話沖咗一粒鐘熱水涼。結果「滴惜仔」竟然嬲到推咗佢落山！

有部分網民就負評，渲染暴力、意識不良；「我唔沖耐啲涼，你咪又係倒啲東江水落海」；「水務署鼓勵殺人」等。另外「滴惜仔」都回應網民幽默留言「倒返滴水落海」，話係「循環再用」；亦有網民讚賞政府公關做得好咗。