陳綺雯堅持追夢

頭條日報-娛樂

更新時間：04:20 2016-08-10 HKT
發佈時間：00:00 2016-08-10 HKT

　　娛樂圈是夢工場，要邁向成功，憑着實力和堅持才是王道。入行7年的陳綺雯（Aki），由模特兒出身，曾是亞視主持，在港視演過劇，又出過EP唱片，她認為每段經歷也是磨練，只要裝備好自己，曾為夢想努力，便無任何後悔。
　　不少藝人入行都是無心插柳，26歲的Aki也不例外，見表姐的影樓相靚，便跑去當私影模特兒，結果被模特兒公司招攬入行，09年還參加了「2009年亞洲遊戲展X香港網絡遊戲展」的「Game模選舉總決賽」，奪得季軍，成功加入亞視，「最初只係上節目做嘉賓，幾次之後，經理人覺得我幾適合，就搵我簽約。」
被炒想過放棄
　　由模特兒轉型做主持，最初Aki也有點怕，幸好拍着經驗豐富的林敏驄主持遊戲節目《智醒智勁四方城》，「做模特兒只係畀最靚一面人睇，好少要講嘢，好彩驄哥睇住，不過佢有時講啲黃色笑話，幾難應對㗎！但佢只係想搞氣氛，唔會過份。節目完咗，佢仲有介紹啲圈中人畀我識，係個好好嘅前輩。」
　　亞視給Aki幕前機會，12年亦令她經歷人生低潮，「同亞視差不多完約，我口頭同經理人講唔續約，所以冇去讀『演藝訓練計劃』，但經理人冇同公司講，公司覺得我唔啱炒咗我，真係好委屈㗎！仲寫咗成千字短訊畀某高層，但佢哋唔聽我解釋，都有喊過，仲諗住離開去台灣進修，後尾有前輩介紹我去港視試鏡拍劇先留低。」
學戲增強實力
　　可惜港視最後不獲發牌，但Aki不覺自己黑仔，「我覺得每個崗位都學到嘢，豐富經驗亦係我依家最大嘅優勢，早排去內地試鏡，內地嘅女演員真係好有實力，所以我都讀緊戲劇課程，仲有學跳舞，因為肢體動作對演戲好有幫助，自己都二十幾歲，無條件去再做花瓶，一定要有多啲實力先至夠競爭力。」
　　Aki離開港視後，雖推出過EP唱片《1 st》，但她發覺最愛是演戲，更以此為目標，「好多歌手可能幾歲就學音樂，我雖然鍾意唱歌，但係論音樂實力，自己真係未夠班，反而演戲我會更有把握，年底我接咗一部電影，雖然未知係咪女主角，只要未來能夠有個角色令觀眾記得，我已經無咩遺憾啦！」
為周杰倫發力
　　談到最想合作的「男神」，Aki即露出冧樣大叫：「周杰倫！」自爆當了10多年忠粉，「我欣賞男仔係睇對方才華，唔使靚仔同有錢，只要有某方面才華，令我崇拜佢就得。當然將來好希望同周杰倫合作，就算只係出現喺同一個鏡頭，已經好開心，所以我會更加努力，咁樣先夠資格襯得起佢。」