晨光追擊│「開心勇駒」步順貫注
更新時間：15:00 2026-08-26 HKT
發佈時間：15:00 2026-08-26 HKT
發佈時間：15:00 2026-08-26 HKT
字體大小
今朝繼續有試閘，相對地在大圈出跳馬並非太多，現將操練報導如下。
「萬事勝利」鍾易禮跳兩段，戴面箍，仍有少許岳頭，但出腳爽勁好多，力度亦增強不少，有進展。「開心勇駒」戴頭罩由希威森跳兩段，平穩走過步順貫注，馬身收靚好實淨，神態對辦觀感不俗。
「凌登」戴眼罩由周俊樂跳兩段，更見專注，從容不迫走過，步順開揚有力，外觀方面又駟正。「加利斯」韋達跳兩段，小心翼翼操控，力度仲未夠，毛色也淡多少，不過台型好吸引。
「錶之星河」戴頭罩由副練跳兩段，一貫內斂唔太起勁，論態已有九分光景，身收壯毛色潤澤，出腳夠輕。「旺旺當道」潘頓拍「妙算貴人」霍宏聲跳兩段，同樣戴頭罩，前駒用暗力拉實，仲有少少急，情緒可以再好，但身型高挑相當省鏡，後駒都係有啲生硬，出腳高並岳頭，仍有好多改善空間。
無敵好瑪進度出色
「無敵好瑪」落腳整齊有力，馬身更見實淨。
「翠紅」戴眼罩及頭罩由助手跳兩段，毛色悅目透光澤，身壯肌肉展現，步爽充滿彈力，不遜贏馬時候。「無敵好瑪」戴頭罩由助手跳兩段，落腳整齊有力，馬身更見實淨，淡定唔急，進度出色。
「新力飆」戴頭罩由副練跳三段，跳來似模似樣，直路加速愈走愈勁，身輕步挺有活力，極具好感。「開心指數」戴頭罩由副練跳兩段，肯走唔再懶散，神色好過之前，馬身亦收壯了，試完大閘上晒力。
「卓越蒨鋒」戴眼罩及頭罩由助手跳一段，輕鬆走過以均速完成，馬身夠扎實，神采奕奕現朝氣，正值勇境。「競駿皇者」拍「辣得爽利」跳兩段，同樣助手，前駒拍住走份外起勁，墜手火氣好，身結實毛色潤澤，後駒尚算規矩，無再岳頭岳腦，不過火力仲未夠。
兆文
