晨光追擊│「手錶之星」求勝心切
更新時間：15:00 2025-07-04 HKT
發佈時間：15:00 2025-07-04 HKT
發佈時間：15:00 2025-07-04 HKT
字體大小
廖康銘上季開倉成績已經唔錯，今季更突飛猛進，不只頭馬數字大增，而且由上年三千多萬獎金，跳升至今季暫時的八千五百多萬，更厲害是打破奧運馬房成績欠佳的魔咒，足證練者是有料之人。
手錶之星睇高一線
「手錶之星」今季在巫廄已於田草四班千二取得連捷。
第五場第四班一二○○米草地：「手錶之星」最初由丁冠豪訓練，一季未完已經他投至巫偉傑馬房，今季在巫廄已於田草四班千二取得連捷，兩季下來累積獎金達到二百三十八萬，但比拍賣價五百六十萬仍差一大截，個多月前又轉到廖廄，可見幕後求勝心切。「手錶之星」上仗轉倉首戰不跑最首本的田草千二，反而轉爭谷草，再看排黃金一檔也有近六倍分頭，擺明並未太過有信心，相對如此仍跑到第四合格有餘。
「手錶之星」今戰跑番田草首本戲，戰意自不可同日而語，尤其賽前上從化備戰，上仗既無如此安排，原來之前在丁、巫廄也未試過北上，更重要廖廄從化兵向來成績不俗，值得睇高一線。
真心傳奇爭三連捷
「真心傳奇」升班孭輕磅更好，再贏無難度。
第十場第二班一二○○米草地：「真心傳奇」上年十一月在谷草千二登場，首兩戰均後上不及屈居亞席，十二月尾移師田草，其追勁在長直路更有用武之地，不只火速補中，尚要按韁大勝，隨後一戰十六蚊大熱添食，贏得驚險只因遇上不太快步速。四一七場曾增程跑千四，當日潘頓墮馬被迫易配，結果易配湯普新亂跑一通，同時經此仗之敗，對上四戰全跑番千二，唔再踏足千四。
部署正確之下，「真心傳奇」近期繼續成為上名常客，先係連續兩仗拚獲季軍，到近兩仗再度取勝，上仗驚險取勝全程孭住頂磅，質新馬跑磅不跑分，升班孭輕磅更好，仲要目前二班惡馬少之又少，再贏無難度。
兆文
