晨光追擊│「扶搖勢勁」輕磅仲好
更新時間：15:59 2025-06-13 HKT
發佈時間：15:59 2025-06-13 HKT
發佈時間：15:59 2025-06-13 HKT
字體大小
又有新練馬師來港！但去到二六/二七年才開倉，為何要提早咁多公布？要知道名氣大如希斯，都係回歸前一季公布消息，而過往升正的副練，更要去到升正的兩個月前先知曉結果，明顯有點大細超味道。
駿彩飛馳評分有利
「駿彩飛馳」大前仗同程只負於頭馬「神駒馬靈」兩馬位。
第二場第五班一六○○米草地：「駿彩飛馳」至今十四戰仲係處女馬身分，最叻只係年初跑谷草千八得亞軍，然而睇番近況，大前仗出爭同程，跑到直路初賀銘年打算移出時卻持續內閃，以致難於推騎，衝得唔順之下負於頭馬「神駒馬靈」兩馬位，後駒贏馬後重返四班五戰全入前四名，亞軍「皮具大師」之後三戰獲兩冠一季。
「駿彩飛馳」前仗谷草一哩輸得較遠，然而檔差要焗留，仲要遇慢步速非戰之罪；至於上仗跑番同程屈居第四，同樣受制慢步速，看三甲馬沿途留守一、二、三位，而「駿彩飛馳」交出8-8-8-4走位，也是唯一留守後邊而改變名次馬匹，足見目前評分極之有利。
扶搖勢勁首仗出色
「扶搖勢勁」首仗即贏四班泥地千二。
第十場第三班一二○○米泥地：「扶搖勢勁」首仗攻陷四班泥地千二，縱使由客串的金誠剛策騎，仍捧到三十五蚊，起步應聲彈出，沿途跟守好位，入直路加速即拋甩對手輕勝，跑第二名是之後取得連捷的「錶之星河」。
「扶搖勢勁」不止贏馬姿態出色，跑出一分八秒二七亦犀利，因為同晚三班頭馬「德心知遇」都係跑出一分八秒一五，而且「德心知遇」接戰再建一功。贏得咁有說服力，「扶搖勢勁」上仗被捧到十三蚊夠晒誇張，但始終一下子加磅太多，三歲馬要孭磅作賽，加上當日場地極利放頭馬，不敵於畀佢輕九磅的「天天耍樂」絕對唔失禮。質新馬跑磅唔跑分，尤其「扶搖勢勁」身型細隻，上三班孭輕磅有好無壞。
兆文
