晨光追擊│「天天同樂」贏開就贏

晨操動態

更新時間：16:00 2025-02-22 HKT
發佈時間：16:00 2025-02-22 HKT

馬會搵來六位騎師做雷霆救兵，不過如果唔係搵到麥道朗、莫雅呢類級數騎師，根本唔會執到潘頓和何澤堯的好馬，所以金誠剛、麥當能、奧爾民的前景唔太樂觀，莫講取得佳績，坐騎也不會太多。

天天同樂再贏一場

「天天同樂」跑番起家直路賽，再贏一場應無問題。

第二場第二班一○○○米：「天天同樂」上季三出三捷，每一仗的姿態均兵不血刃，亦因為星味十足，不少人今季對牠寄予厚望，可是此駒首四戰全部無功。睇番每一戰走勢，首兩仗同程均以短距離見負，尤其102場排外檔放得極快，去到末段才功虧一簣。大前仗扳上千四一樣重飛，無奈欠缺氣量，更弊遇上快步速，未有大敗已唔錯了。

「天天同樂」前仗跑番同程自造快步速，頂到最後一百五十米才轉弱，保住第三名，趕過牠的「精算暴雪」與「華麗再勝」翌仗再串Q，後駒近期再贏多一仗。

「天天同樂」上仗轉場並縮程順利勝出，贏馬距離不遠只因大半程搶口，明星馬終於重啟勝門，可望贏開就贏，跑番起家直路賽，再贏一場應無問題。

元朗精英持續向上

「元朗精英」四升三肯定無阻力，形勢大好。

第九場第三班一四○○米：「元朗精英」上季次回合打開在港勝門，於田草千二險勝「祝願」，後駒踏入今季扶搖直上，更勝出香港經典一哩賽，足見該席頭馬水準極高。

「元朗精英」近三戰均配潘頓熱捧出擊，大前仗走外疊蝕位敗北，前仗末段受困，發揮大打折扣，到了上仗加戴眼罩，不止成功補中，尚要贏夠三個馬位，雖然跑出時間看似普通，實則因為步速唔快，相對如此情況仍可後上大勝，其實是高水準之作。「元朗精英」搵到眼罩這個最佳配備，當打馬有望持續向上，尤其目前三班水準不高，四升三肯定無阻力，仲要吼準拆組對手進一步減弱，形勢大好。

兆文

↓立即下載星島頭條App↓