晨光追擊│「帝豪歡星」不勝無歸

晨操動態

更新時間：16:00 2025-02-08 HKT
發佈時間：16:00 2025-02-08 HKT

潘頓地位確非比等閒，好似最近飲紅酒都飲得特別招積，條跑道任佢坐已經誇張，仲要着埋件馬會官方綵衣，馬會咁錫一個騎師真係從未見過，未來退休後會唔會開倉，只係睇潘頓取捨而已。

帝豪歡星氣勢正盛

「帝豪歡星」上仗力拼僅負，與同頭馬雙雙彈甩馬群。

第一場第五班一四○○米：「帝豪歡星」起初由告東尼訓練，首季四戰悉數大敗，第二季已極速落到五班，去到二三年尾表現大有進展，一連三仗上名，誰不知之後無一次有好表現，跟手告東尼也選擇放棄。

「帝豪歡星」上季中由鄭俊偉接手出賽唔多，並非馬匹健康有事，純粹擔心減分太快救唔番，點知今季低分起步，首四戰仍未有佳作，於是馬主又安排轉倉。馬圈現實眾所周知，事實上游達榮真係叻，唔再安排「帝豪歡星」出戰短途，初出跑千四試準，前仗再接再厲並加戴交叉鼻箍，不止順利勝出且姿態輕鬆。上仗縱未能添食，力拼僅負且同頭馬雙雙彈甩馬群。氣勢正盛、跑法主動前置亦是優勢，巴度今仗只要鎮定做事，不勝無歸。

鄉村樂韻越跑越好

「鄉村樂韻」再一次跑番直路賽。

第三場第四班一○○○米：「鄉村樂韻」過往屢次熱倒，直至251場次於谷草千二終打開勝門，看其末段姿態認真誇張。接戰轉戰同程直路賽，在陌生路程早段都係落後，但又造最快末段追入第二，只敗於十四檔賺盡形勢兼已走甩的「宇宙動力」。

「鄉村樂韻」前仗仍在五班出戰佔盡優勢，結果改攻田草千二捧至三十一蚊建功，無疑贏個馬鼻好驚險，不過再一次交出凌厲衝刺後來居上，表現出色。一如大多蔡廄質新馬越跑越進步，上仗「鄉村樂韻」殺上四班也不落下風，比較特別是再一次跑番直路賽，明顯蔡約翰覺得跑此程步速更快，更有利馬兒追趕，再看該仗步速並不快，冠亞殿軍馬全程領前，而「鄉村樂韻」能交出11-9-3走位，雖敗猶榮。

兆文

↓立即下載星島頭條App↓