星級大搜查｜明星揀錶有乜準則？《中聲2》人氣王愛「天價」名錶 兩大娛圈隱藏「錶王」曝光
發佈時間：08:00 2025-06-16 HKT
明星藝人要裝身，行頭自然少不了，手錶可以說是「行頭」的關鍵之一。今集《星級大搜查》搜查一吓，一眾藝人是如何選擇手錶，以及對於購買手錶有哪些偏好及心水品牌。
謝君豪獨愛古董錶
《星級大搜查》訪問了多位藝人分享選購手錶的偏好。不少藝人包括周秀娜、江嘉敏、張與辰及黃博等，都表示較常用手機看時間，手錶則成為他們的飾品之一。
江嘉敏表示手錶的外型是她買錶的首要考量。她說：「我覺得要靚囉，因為要嚟襯衫㗎嘛，我自己都有錶嘅，但有唔同顏色唔同形狀，圓形或者正方形，顏色就有金色同一隻銀色，最基本嘅襯衫顏色我都有。」謝君豪則表示偏好古典款式，「我比較鍾意啲古典啲嘅 ，我好鍾意古董錶。」
羅啟豪重視手錶功能性
有人追求款式，亦有人重視手錶的功能性。羅啟豪說：「我都係近年先有幫自己買錶，唔係好貴，都係千多元。我個人比較鍾意功能性，多於個價錢或者品牌，呢幾年我都係想買一啲智能錶，可以監察到我行咗幾多步，最緊要係呢樣嘢。」 周吉佩則指平日經常戴手錶，直言「冇錶係會唔自在」，他說：「我平時係唔用智能手錶，我淨係用啲低智能，即係用上鍊嗰啲，唔需要用電，最緊要防撞。」黃博則笑言自己重視手錶實用性：「我比較鍾意係防水功能比較好嘅，同埋輕盈啲冇咁重嘅。」
相關閱讀：星級大搜查丨明星爆趣洗頭秘招大公開 方力申忌𢯎頭Edan講究地心吸力 娟姐：唔洗太乾淨
邱士縉買錶最緊要保值
款式和功能以外，當然亦有不少藝人熱愛經典手錶品牌，既是品味象徵，同時有保值作用。邱士縉（Stanley）說：「我注重佢嗰個保值嘅程度，手錶嚟講，相對都有多一個功能就係可以保值，又可以戴住嚟保值，呢個都係我會睇嘅嘢嚟。」
而出名對手錶甚有研究的譚輝智則說：「好多我哋呢啲年紀嘅，好多男仔唔係鍾意車，就係鍾意睇錶。好多錶我都好鍾意睇，每個牌子都會有啲心動，但你買完呢隻，又未必係戴一世，你又會睇第二隻，所以我都係睇居多。有時有啲心動嗰啲錶都會買嘅，類似勞力士嗰啲。」他認為最受歡迎的名錶品牌是勞力士（Rolex）、AP（Audemars Piguet）及PP（PATEK PHILIPPE），更笑言自己的「夢中情錶」就是PP的出品。
相關閱讀：星級大搜查丨明星千奇百趣恐懼症 P1X3L成員有尖嘴恐懼 糖妹最驚一種聲音 醫生：屬於精神病
張與辰愛陀飛輪
至於同樣對名錶有追求的還有張與辰。他說：「我自己本身係比較鍾意指針錶，因為我覺得指針比較復古。」張與辰表示喜歡陀飛輪，「真係正啲啊嘛！尤其是自己上鍊嗰啲呢！」而且他認為戴手錶予人一種重視時間的感覺，「我覺得都係要時刻提醒自己要重視時間，同埋要準時呢件事。」
張敬軒：手錶係一種品味
張敬軒則表示自己觀念較傳統，他認為戴手錶有重要的意義。他說：「我覺得戴錶除咗係一個生活上對自己時間觀念嘅要求之外，其實都係一種品味嚟，細個唔係好明，大個就真係會儲錢買錶。」張敬軒認為買錶就如人生的里程碑，「對於我嚟講係提醒自己要珍惜時間，譬言我對我身邊重要的人，佢哋生日我都會送隻錶畀佢哋，因為佢哋將佢哋嘅時間畀咗我，咁我又冇得畀返啲時間佢，咁我就送隻錶畀佢，將來有必時可拿去典當。」他笑說。
相關閱讀：星級大搜查丨新一代「明星街市」大公開 檔主爆陳山聰、陳煒專攻煲湯料 呢個街市外圍最易偶遇藝人
方中信、陳卓賢被爆是愛錶之人
眾所周知，娛樂圈中有不少人熱愛儲名錶，今集《星級大搜查》加入「爆料」環節，由藝人們分享哪位圈中人是「錶王」。邱士縉大爆MIRROR的陳卓賢（Ian）原來特別喜愛手錶而且甚有研究，張敬軒則大讚方中信（方中Sir）是最有品味，他說：「以我所知，方中Sir有好多好靚嘅錶。」江嘉敏則說：「錶啊！玩得最出名係咪黃宗澤（Bosco）？同埋張智霖囉！」
你又覺得邊位明星藝人對手錶最有研究呢？不妨留言給《星級大搜查》分享吓！
