蔡天鳳碎屍案|鄺球:因鄺港智「大陸有條女」 蔡天鳳性格180度轉變
發佈時間:13:36 2026-11-18 HKT
28歲名媛蔡天鳳(Abby Choi)2023年2月疑遭殺害後肢解烹屍,蔡天鳳前夫鄺港智、前家翁鄺球、前夫兄長鄺港傑否認謀殺罪。案件踏入第40日審訊,鄺球承認曾辱罵蔡天鳳為「生仔機器」,認為蔡天鳳「唔係唔尊重我家庭,佢係180度轉變咗啲性格,原因就係佢知道Alex喺大陸有條女」,又否認蔡天鳳看不起鄺家稱「點解睇唔起?佢收咗我咁多錢,負責一個banker咁嘅角色,啲錢邊個畀佢呢⋯⋯」
稱鄺港智內地有女友後蔡天鳳性格180度轉變
鄺港智代表大律師安華暉盤問指鄺球對發燒事件輕描淡寫,鄺球解釋「一種家庭嗌交啲嘢好小問題,喺我心目中」。鄺球否認當時曾經打過蔡天鳳,「冇打佢,如果打佢報咗警啦」。安華暉指鄺球想打蔡天鳳,惟遭譚方駿鄺港傑阻止,鄺球否認指「冇嘗試,冇咁嘅意識想打佢,係想鬧交啫」。然而鄺球承認曾辱罵蔡天鳳為「生仔機器」,但不是出於蔡天鳳為譚家誕下2個孫兒而得到金錢。鄺球同意觸發衝突是因為蔡天鳳不尊重李瑞香,因而情緒激動,但認為「佢唔係唔尊重我家庭,佢係180度轉變咗啲性格,原因就係佢知道Alex喺大陸有條女」,又指直至最後鄺港智蔡天鳳仍關係親近。
否認蔡天鳳看輕鄺家 「佢收咗我咁多錢」
安華暉指根據蔡天鳳向母親發出的語音訊息,當中提及鄺球一家時說話難聽,態度惡劣,鄺球回應「我都唔知㗎喎,因為佢冇同我對過話嘛,喺背後講人呢啲係小人來囉我覺得」。安華暉指由此可見在發燒事件前後,鄺球理應或多或少感覺到蔡天鳳看不起鄺家,鄺球回應「我唔知喎,點解睇唔起?佢收咗我咁多錢,負責一個banker咁嘅角色,啲錢邊個畀佢呢⋯⋯」安華暉提到譚家更富裕,鄺球答「我唔知佢有幾多錢喎,佢有佢嘅嘢,我有我嘅嘢,譚家還譚家,我搞得掂屋企嘅生活就ok㗎啦」。
不知蔡天鳳拒讓子女與其見面 「你講我先知」
安華暉指發燒事件後,蔡天鳳拒絕讓2名子女見鄺球,鄺球稱「佢冇直接同我講呢樣嘢,你講畀我聽我先知咋嘛」。鄺球指2022年6月到2023年農曆新年期間曾見過2名孫兒,安華暉問可有人告訴鄺球蔡天鳳因此感到憤怒,鄺球答「冇喎」。
蔡天鳳農曆年聚會無露面 鄺球:唔得閒咪唔出席囉
鄺球被問及為何蔡天鳳不在時,則指「啲年輕人好多節目㗎嘛,我點知佢係咪又去咗澳門賭錢呢,你都話係前嘅新抱,人地嘅自由嚟㗎嘛」,強調「呢啲好小問題咋嘛,佢唔出席咪唔出席,唔通佢唔出席我又唔開心咩,出席我又開心咩,得閒咪出席囉,唔得閒咪唔出席囉」。
「唔俾見兩個孫當然唔開心…打官司囉」
安華暉質疑,若蔡天鳳不讓鄺蔡子女見鄺球,鄺球會感到十分不高興。鄺球反問「唔可以見?邊個權力可以俾佢唔俾佢地見我,有咩可以法庭解決㗎嘛」,更指「當然唔開心啦,如果唔俾見兩個孫」。鄺球被問及是否會感到憤怒時,他反問「唔開心同嬲有咩分別啊?」在安華暉追問下,他回應「唔開心呢樣嘢可以剋制到嘅自己,如果佢真係唔俾我見啲孫嘅,咁咪去家事法庭解決囉」。安華暉反駁道,蔡天鳳有撫養權,鄺球回應「我知道,但係撫養權佢都要俾我嗰仔Alex見㗎嘛」,更指家事法庭都會安排一星期見一兩次。鄺球指「我咪搵律師處理囉,睇下有無嘢做到囉,打官司囉」。
相關新聞:
蔡天鳳碎屍案|鄺球認對蔡天鳳被肢解負全責 「我企喺度,對住個膠箱呆咗」
蔡天鳳碎屍案|鄺球稱為家中每人分配角色 蔡天鳳負責財政與鄺港智研究投資
蔡天鳳碎屍案|鄺球稱對兩子一視同仁 否認與鄺港智不和 曾為幼子還款600萬元
鄺港傑、鄺球、鄺港智同被控1項謀殺罪及1項阻止合法埋葬屍體罪。控罪指3人於2023年2月21日,在大埔汀角路龍尾村56B村屋地下內謀殺女子蔡天鳳,並在2023年2月21日至23日期間,於同地阻止合法埋葬蔡天鳳的屍體。三人否認謀殺罪,但承認阻止合法埋葬屍體罪。
本案以英語進行,由暫委法官祁彥輝(Brian Keith)審理,控方由外聘資深大律師郭莎樂(Charlotte Draycott)、高級助理刑事檢控專員梁育珩、高級檢控官林曉敏及吳希樂、檢控官尹培軒代表,鄺港傑由大律師Trevor Beel代表,鄺球由大律師戴偉奧(Oliver Davies)代表,鄺港智由大律師安華暉(Andrew Raffell) 代表。
案件編號:HCCC198/2025
法庭記者:陳子豪 黃巧兒

















