辭職等12月返新工竟遭「彈弓手」!HR一原因臨時收返Offer 苦主崩潰淪雙失青年|Juicy叮
發佈時間:08:02 2026-11-18 HKT
打工仔轉工最怕遇到「彈弓手」,一旦辭去舊職卻被新公司臨時放飛機,隨時陷入兩頭不到岸的絕境。有網民在Threads發文替朋友大吐苦水,指朋友收到新工作Offer後便向舊公司遞信辭職,豈料在準備履新之際,竟突然收到新公司通知取消聘用,令本身情場失意的事主瞬間淪為「雙失青年」,帖文引發極大迴響。
準備12月返工簽約 新公司突反口:唔夠穩定
樓主在帖文中透露,其朋友早前成功獲新公司取錄,於是安心向原職公司辭職,「準備12月1號第一日返工簽約」。沒想到在等待上班期間,朋友突然收到新公司的來電,「又話唔請佢,話佢唔夠穩定,所以考慮完都係唔請,收返個offer」。
樓主無奈表示,朋友本身已經「情場都失意」,如今連新工作也泡湯,瞬間變成「雙失青年」,在留言區更透露事主面對突如其來的打擊,現時「喊到X街」,不知如何收科。當有網民驚訝詢問「仲可以突然收返㗎咩」,樓主則回應指當時「可能因為口頭...」承諾,尚未正式簽署文件。
網民怒轟公司無良 質疑背景審查出事
對於新公司以「唔夠穩定」為由收回成命,大批網民看不過眼,紛紛留言炮轟涉事公司做法極不負責任。有網民直斥「出左offer彈弓手已經好cheap, 仲要話人唔夠穩定,責任不在佢咁,cheap 上加cheap!」,亦有留言諷刺指「出offer之前麻煩,完成好曬所有流程程序先好出,自己本身公司都唔穩定,仲去學人請人,話人唔穩定,九唔搭八,垃圾公司」,紛紛要求事主「開間公司名啦,警世」,好讓其他求職者避雷。
與此同時,有網民推測,新公司突然反口未必單純因為「唔夠穩定」,懷疑是背景審查(Reference Check)出現暗湧,留言分析指「似bgc肥左,唔敢講你知」,或者「當佢聯繫舊僱主時發現有異常,都有機會作出反向動作」,甚至有網民戲言「舊同新公司老闆會唔會互識」。
不過亦有人安慰事主塞翁失馬,認為「換左新公司做落都可能伏,當做唔駛親身試伏啦」,又鼓勵指「呢個先係好開始嘅徵兆...所有唔好嘅嘢都離開, 有空間俾新嘅嘢入嚟」。
「簽約先辭職」定「簽咗都冇用」? 網民掀職場風險論戰
事件亦引發網民對「何時才應該遞信辭職」的激烈爭論,不少打工仔認為事主未簽正式合約便辭職過於冒險,強調「一日未簽合約 一日都唔好辭職」,更有人分享自身經驗指「我n年前收到新公司offer,個HR打電話叫我可以辭咗份工,佢話個offer係通過幾個部門嘅director簽咗approve咗,叫我盡快辭職因為個位等緊我返工,但係我都堅持一定要親身上去簽完約先返舊公司辭職」,有網民亦直言「你HR做嘢做快啲嘛,有乜理由由我承擔風險?」,認為至少要有白紙黑字的確認電郵或簽妥 Offer Letter 才可行動。
不過,另一派網民則指出本港不少行業慣常在「第一日返工先簽約」,而且即使提前簽約亦非免死金牌,有留言指出「其實就算簽咗約你返左工佢唔啱都可以叫你即走㗎啦」,因為在試用期首月內,「即使簽咗約,雙方都係有權以一日通知,終止合約」,甚至「到時佢都可以七日試用唔滿意叫你收皮」,感嘆在現行制度下「每次轉公都係一場賭博」。
過來人獻計自救:嘗試撤回辭職或追討賠償
面對進退兩難的局面,不少有相似經歷的過來人紛紛在留言區獻計,有網民建議事主放下面子向舊公司求情,「同公司講 睇下收唔收得番」辭職信。一名網民更分享身邊同事的成功例子,指「我teammate試過,last day前一日,佢diy散水餅都準備埋......好彩未請到人,同hr講我地成功留到佢,取消辭職」,引來樓主羨慕大讚「你哋好好呀!」。但該名網民亦補充「前提佢係一個好同事 ,好幫到手」,其他網民亦提醒「如果上司唔中意你,可以執正來做話交在信無得退」。
除了嘗試留任原職,也有網民建議透過法律途徑向反口的新公司追討損失,有苦主分享十多年前的親身經歷,表示當年「試過星期六收到冇來電顯示電話話取消offer,果時我仲要係俾咗差唔多$5000舊公司提早走」,最終他「聽咗區議員建議去小額錢債要求對方賠錢,最終成功咗」由取消 Offer的公司作出賠償。另有網民補充指,「如果有Written Offer,即使未簽約,都係有效,咁你朋友亦真係因為佢比Offer先Resign,可以去勞工處試下,之前有Case係賠咗3個月出嚟」,建議事主若有保留相關證據,不妨向相關部門查詢及爭取權益。
來源:Threads
延伸閱讀:60歲文職失業逾年求教「點包裝空窗期」 網民竟一致提議用這藉口:HR無法挑剔

















