蔡天鳳碎屍案|鄺球指買大湯煲作花盆種冷籐植物 大炸篩打邊爐用

更新時間:18:02 2026-11-17 HKT
發佈時間:16:05 2026-11-17 HKT

28歲名媛蔡天鳳(Abby Choi)2023年2月疑遭殺害後肢解烹屍,蔡天鳳前夫鄺港智、前家翁鄺球、前夫兄長鄺港傑否認謀殺罪。案件踏入第39日審訊,鄺球首日出庭親述,他欲在龍尾村單位門外設置圍欄,購買護目鏡防止「啲碎屑整到眼」,另購買大湯煲作花盆種冷籐植物。鄺球又指,肉檔的砧板及菜刀多細菌,他購買砧板及菜刀自己切肉,惟雪櫃可以用二手,另幫友人購買碎肉機。鄺球提及,大炸篩可於打邊爐用。

買二手鋸與鎚子準備為村屋設裝設圍欄

鄺球憶述,龍尾村單位業主許欣欣建議他可在單位門外安裝圍欄,因此「我打算自己裝修整呢個圍欄」,並聯絡內地好友阿權「幫我一齊做呢個圍欄」,因「阿權喺大陸做裝修公司」。鄺球透露,他打算用竹交叉捆綁建成圍欄,因此他「買咗啲工具啦,例如係啲鋸,鋸木鋸竹嗰啲,仲有嗰啲鎚仔,好似買咗鎚仔」。鄺球回想,他在鴨寮街的一間店鋪內購入一把全新的鋸,其後在「鴨寮街啲街邊檔嗰啲小販度」購入一把二手鋸。鄺球表示,全新的鋸「800幾蚊一把」,二手鋸則是「200幾蚊一把」,他將兩把鋸帶到龍尾村單位。

相關新聞:
蔡天鳳碎屍案|鄺港傑稱不見弟用武器攻擊蔡天鳳頭部 不知傷勢由何人造成
蔡天鳳碎屍案|龍尾村閉路電視下行為正常伸懶腰 鄺港傑:強裝鎮定「唔知做緊啲咩」
蔡天鳳碎屍案|鄺港傑稱曾選擇保護胞弟 因「細佬仲好後生,爸爸就大年紀啦」

為免鋸竹期間有碎屑入眼 買兩面罩當護目鏡

鄺球被問及單位內的面罩時,他指「喺嗰啲雜貨店買兩個面罩」,儘管他沒有鋸竹的經驗,惟他認為假設要鋸竹「一定要帶嗰啲護目鏡,如果唔係啲碎屑咪會整到眼」,一個面罩是「我自己戴」,另一個面罩是「如果阿權落嚟幫我手,咁佢咪可以帶一個囉」。鄺球形容「我自己諗用啲繩啊,用啲膠帶(索帶),用啲釘」固定竹子整圍欄,而「Damon幫我買咗啲繩,同埋啲膠帶嗰啲」。

買大湯煲充當花盆種冷籐 

鄺球又指「我買咗個大嗰啲煲湯嗰啲煲,種植啲冷籐,用嚟做花盆」,鄺球形容湯煲有兩個大手柄,因此可以將竹的繩固定在手柄上。另外,業主表示「如果落大雨,門口出面有條大水坑,會有水浸嘅情況出現」,因此購買了兩件雨褸及兩對水靴,一套自用,另一套「係for邊個嚟我屋企咪著,我大仔又好,我太太又好,女朋友又好」。

稱肉檔砧板多菌 自購砧板菜刀及牛肉刀

鄺球提到,他購買了牛肉刀、菜刀及砧板的原因,是「因為本身我做飲食業,我知道係肉檔嗰啲砧板好污糟,好多細菌」,因此「我唔想係肉檔佢幫我切」,欲「我自己買返嚟切,避免用佢啲砧板」。他另外購入了中型尺寸的二手雪櫃「因為雪櫃好易清理裏面,買二手都無所謂,雪櫃好襟用㗎嘛」,強調是「家庭用嗰啲,唔係大雪櫃」。

內地朋友託買碎肉機、碎骨機

鄺球透露,他於2023年2月8日在上海街購買碎肉機,惟他沒有將碎肉機帶到龍尾村單位,因「買呢部機之前一個星期,廣州大陸有個朋友叫保叔,佢做飲食業嘅,佢叫我係香港,幫佢買呢個碎肉機,同埋厨餘機,俗語有啲人叫碎骨機」。鄺球被問及為何寶叔不在內地購買厨餘機時,鄺球回應「大陸嗰啲唔係咁襟用,外國牌子襟用啲,大部分做飲食業嗰啲都係買外國牌子多」。

買碎肉機當日並一併購買大煲炸篩

鄺球確認,當日鄺港傑前往上海街找他欲一同食午飯,他在購買碎肉機時「售貨員拎呢部碎肉機」予鄺球檢查,「就拆開呢個碎肉機插電,俾我睇下呢個運行嘅情況」。鄺球確認碎肉機運作正常後「就買咗呢部機啦,同時睇下鋪頭有無其他嘢買,買咗好大個煲、嗰啲籬,同埋買咗嗰炸篩」。

碎肉機金屬托盤遺留車上

鄺球透露,他以現金支付款項,大約8千元左右,隨後店員協助他將碎肉機放回盒子內,惟她將金屬托盤塞入盒時「幾乎個箱俾佢塞爛咗咁滯」,因此鄺球提議將托盤拿出放在車上。證據顯示,警方在單位找到該金屬托盤。鄺球解釋,他將碎肉機在「即日傍晚時分去咗紅磡火車站交咗畀阿保叔個伙記,等佢帶返大陸」,其後再沒有見過部碎肉機。

大炸篩用作打邊爐

鄺球又指,他購買小湯煲「用嚟煲湯飲」,大湯煲則用作種植冷籐植物,令單位「好睇啲有啲綠色植物」。鄺球形容,大炸篩是「打邊爐用㗎」,解釋道「大陸打邊爐嗰啲文化同香港啲打邊爐文化唔同,啲人好中意將成碟牛肉倒入去」,他自言「大陸朋友多,咪就返佢地啲文化,同埋我自己都係咁樣係大陸生活」,並指「如果你朋友多,打邊爐咪可以承載啲牛囉,成碟倒曬落去都得㗎嘛」。鄺球提到,涉案單位的噴漆並非由他購入,應該是鄺港傑購買的,以用作竹欄定位及量度距離。

買帆布鋪地免噴紙摺畫油滴落

鄺球回想,他在上海街另購買了膠帆布,因打算在天花板噴上了紙摺(紙模)彩畫,因此「我驚啲油滴咗落地下好難清潔,我咪揾帆布鋪住」,惟該些帆布根本難以塞入透明膠箱,而他仍未有空前往廣州購買彩畫。

用紙皮遮窗免陽光射入休息時「唔舒服」

鄺球提到2023年6月5日買來膠帆布後,翌日鋪設在村屋地上,惟沒有鋪在牆上,另外用上了紙皮遮蔽窗戶,解釋因為「窗簾可能薄過頭、透光⋯⋯我做完運動通常會睇下報紙睇下書聽下歌,有時瞓下晏覺,太陽射入來咪唔舒服,咪用嗰啲紙皮遮住個窗」。鄺球交代甫租用單位便會去龍尾村村屋「散步、緩步跑,喺嗰度食晏啦,有時候做下啲運動啦,返去之後跟住唞下啦,睇下報紙睇下書聽下歌囉,同埋最多都係瞓晏覺,又曾在龍尾村村口2間茶餐廳用膳,記得其中1間叫「BB開心棧」,「另一間唔記得個名喇」。

帳篷由尚文苑帶到龍尾村單位

鄺球又交代會在村屋「洗嘅都係襪呀、底褲嗰啲,面嗰啲衫都係攞返尚文苑洗衫多」,所以帶備了嬰兒用洗衣盆「浸衫褲」。至於帳篷鄺球供稱由「尚文苑帶過去嘅,去做水上運動游水嗰陣呀,可以擺低隨身物品」。鄺球另指村屋中「自己做清潔,Damon幫我做清潔,佢幫我洗過天井」。鄺球再指當時計劃要買電視、洗衣機及床。

政府推行電話實名制 當日購2張Sim卡

鄺球指租用凱旋門打算供女朋友居住,女朋友原居於銅鑼灣,「住得悶咪搬下囉」。被問到何不於龍尾村同居,鄺球指「我入龍尾村目的就係養生、健康身體,好多人唔習慣住呢啲村屋嘅,鍾意住城市區嘛,所以冇要求人入去住」。鄺球最後交代案發當日購買2張Sim卡供鄺港智及自己使用,因為港府實行電話卡實名制,儲值卡將於某日停用,另外鄺港智當時用的電話卡由譚方駿登記,鄺港智投訴「Chris就好煩,成日打畀佢傾埋啲無聊嘢,唔想再傾咁多無聊嘢」,遂打算重新買入電話卡,並將原有電話卡交還譚方駿。

相關新聞:
蔡天鳳碎屍案|鄺球出庭作供:曾匯款3千萬元予蔡天鳳購加多利山 「單位業主用我名」
蔡天鳳碎屍案|鄺球:同意出售加多利山 初拒簽授權書因律師提醒「老人癡呆症」才用
蔡天鳳碎屍案|鄺球稱從未與蔡天鳳因物業口角 租龍尾村屋因清淨空氣好

鄺氏三父子被控謀殺蔡天鳳

鄺港傑、鄺球、鄺港智同被控1項謀殺罪及1項阻止合法埋葬屍體罪。控罪指3人於2023年2月21日,在大埔汀角路龍尾村56B村屋地下內謀殺女子蔡天鳳,並在2023年2月21日至23日期間,於同地阻止合法埋葬蔡天鳳的屍體。三人否認謀殺罪,但承認阻止合法埋葬屍體罪。

本案以英語進行,由暫委法官祁彥輝(Brian Keith)審理,控方由外聘資深大律師郭莎樂(Charlotte Draycott)、高級助理刑事檢控專員梁育珩、高級檢控官林曉敏及吳希樂、檢控官尹培軒代表,鄺港傑由大律師Trevor Beel代表,鄺球由大律師戴偉奧(Oliver Davies)代表,鄺港智由大律師安華暉(Andrew Raffell) 代表。

案件編號:HCCC198/2025
法庭記者:陳子豪 黃巧兒