蔡天鳳碎屍案｜鄺港傑重返龍尾村屋見染血電鋸 猜測「Abby個屍體有某部分應該被肢解咗」
發佈時間：17:32 2026-11-12 HKT
28歲名媛蔡天鳳（Abby Choi）2023年2月疑遭殺害後肢解烹屍，蔡天鳳前夫鄺港智、前家翁鄺球、前夫兄長鄺港傑否認謀殺罪。案件踏入第36日審訊，鄺港傑供稱案發當晚偕父回到龍尾村村屋，房內「我見到地下有1塊草草擺喺度嘅帆布，帆布上面有個帳篷，然後有個膠箱喺地下⋯⋯我見到、我見到有個被鋪包住嘅物體，其中一端有啲血滲出來，帆布地下見到1個⋯⋯鋸木嘅電鋸」，「個刀片上面有少少血」，因而猜測「我認為Abby個屍體有某部分應該被肢解咗」。
重回龍尾村村屋問父親有否報警
鄺港傑供稱案發當晚在荃灣泊下車後，收到鄺球來電，對方問及其所在，又問「細佬點樣樣呀？」鄺港傑交代行蹤後，鄺球要求鄺港傑到大埔市區某茶餐廳會面，鄺港傑因為精神狀態差又感到疲累，遂乘的士赴約。
2人晚上10時許回到龍尾村村屋，當時鄺港傑手持背囊。鄺港傑憶述進入村屋後，蔡天鳳屍首膠箱「見唔到喺原位」，2間房間房門1開1關，「我問爸爸諗住點樣處理呢件事、有冇報警之類？爸爸冇回答我⋯⋯佢隨即就開咗道門」。
鄺港傑回想當時「望到入面，我見到地下有1塊草草擺喺度嘅帆布，帆布上面有個帳篷，帳篷係打開㗎，然後有個膠箱喺地下，個膠箱有個蓋冚埋，個箱入面係透明㗎嘛，我見到、我見到有個被鋪包住嘅物體，其中一端有啲血滲出來，帆布地下見到1個⋯⋯鋸木嘅電鋸」。鄺港傑記得帳篷「係我自己喺上年嘅夏天買來擺咗喺荃灣屋企」，其後置諸不理。
看到電鋸刀片染血猜測蔡天鳳已被分屍
鄺港傑憶述，他不但在睡房內的電鋸上發現「嗰刀片上面有少少血」，更見到膠箱內裝著的「被鋪嘅一段有血」，描述「張被鋪係滲咗好多血」，
因而猜測「Abby個屍體有某部分應該被肢解咗」，他直言「我望到嗰時都驚訝啦自己」，因此沒有向鄺球問發生什麽事「我唔知可以同佢講啲咩問題」，更指「我嗰刻無做任何嘢」。
鄺港傑透露，他另發現睡房的地上鋪滿藍白間條的帆布，惟「喺嗰日之前無見過，我係嗰刻先第一次見過呢嗰帆布」，亦不知鄺球什麽時候購入帆布。庭上展示案發房間的照片，顯示睡房的牆上亦鋪滿帆布。鄺港傑直言「係我黐㗎」，當時「爸爸拖咗個膠箱出嗰廳到，嗰時嘅帆布係好roughly咁鋪，然後爸爸叫我鋪好啲，叫我用膠紙黐好佢，然後我就黐啦」。鄺港傑形容「我嗰刻無思考咁多，思考唔到咁多嘢，因為我見到嗰個畫面我已經好震撼」，好似「Blank Out（空白）咗」。
相關新聞：指蔡遇襲後披頭散髮癱臥車上 鄺港傑稱：我至少應報警或call白車
相關新聞：鄺球以薄被將蔡天鳳包裹放膠箱 指示鄺港傑搬入屋
相關新聞：鄺球勸兩子儘快離開由其處理 兩兄弟清理車廂 將蔡鞋、袋帶入屋
相關新聞：鄺港傑稱事後：呃自己件事冇發生過 警方尋獲殘肢才「開始喊出來」
鄺港傑、鄺球、鄺港智同被控1項謀殺罪及1項阻止合法埋葬屍體罪。控罪指3人於2023年2月21日，在大埔汀角路龍尾村56B村屋地下內謀殺女子蔡天鳳，並在2023年2月21日至23日期間，於同地阻止合法埋葬蔡天鳳的屍體。三人否認謀殺罪，但承認阻止合法埋葬屍體罪。
本案以英語進行，由暫委法官祁彥輝（Brian Keith）審理，控方由外聘資深大律師郭莎樂（Charlotte Draycott）、高級助理刑事檢控專員梁育珩、高級檢控官林曉敏及吳希樂、檢控官尹培軒代表，鄺港傑由大律師Trevor Beel代表，鄺球由大律師戴偉奧(Oliver Davies)代表，鄺港智由大律師安華暉(Andrew Raffell) 代表。
案件編號：HCCC198/2025
法庭記者：陳子豪 黃巧兒
