蔡天鳳碎屍案｜鄺港傑指買索帶麻繩鎚子等 助鄺球為龍尾村屋建圍欄

28歲名媛蔡天鳳（Abby Choi）2023年2月疑遭殺害後肢解烹屍，蔡天鳳前夫鄺港智、前家翁鄺球、前夫兄長鄺港傑否認謀殺罪。案件踏入第35日審訊，鄺港傑稱鄺球欲為龍尾村村屋製作圍欄，故助父到五金店購買索帶、麻繩、尼龍繩、螺絲批、膠紙及鎚仔。隨後鄺港傑經過日本城「諗住買啲『林審嘢』嘢適合我爸爸屋企」，因此主動購買了廚房剪刀、液態除臭劑、酒精抹紙、滴露消毒噴霧、空氣清新劑，應父要求買儲物膠箱時「順手買埋個垃圾袋」。

解釋買索帶麻繩等物因父欲為龍尾村單位建圍欄

承認事實指，2月8日鄺港傑同時到大德五金購物，買了5對防滑手套、1包索帶、1卷麻繩及4卷尼龍繩，鄺港傑今解釋鄺球之前提及龍尾村村屋「寧寧舍舍缺少咗1個圍欄，門口嗰啲，會自己搞個類似圍欄」，由於當日休息時間有限，遂問鄺球「有冇嘢想買，我幫你買埋，咁就慳返啲時間」，鄺球遂指「諗住整圍欄，需要嗰啲物品」。鄺港傑交代「完全唔熟悉，問佢有咩需要買，當時佢話『固定住紥住嘅物料，同埋見到其他有咩啱用嘅物料都幫我買埋啦』」，於是鄺港傑就到大德五金購物。

指片段中舉動是想象圍欄寬厚度與手掌相似非量度手腕

大律師Trevor Beel關注，鄺球的龍尾村單位的鄰居安裝了白色圍欄，鄺港傑確認鄺球亦仿效鄰居裝上圍欄。庭上播放鄺港傑在五金店的閉路電視片段，顯示鄺港傑挑選了不同款色的索帶放在手腕上。鄺港傑解釋「由於我當時冇任何量度工具喺手」，因此只能靠想象圍欄的寬度及厚度，他認為圍欄的寬度及厚度與其手掌寬度相似，因此作出片段中的舉動，更強調「我唔係度緊個手腕」。鄺港傑確認，曾將索帶捲成一圈「睇下扣完之後有幾大」，惟未能記起是否在比較所有索帶的大小後購入最大的索帶「因為我都係約莫咁買」，補充指理應是購入最大的索帶「大好過細啊嘛」。

鄺港傑提及在大德五金店購買了麻繩及尼龍繩，因根據「爸爸嘅指示買啲固定、紥住嘅物料」，抵達店鋪後發現有大量相似的繩索，價錢亦十分便宜，僅10至20元左右，因此「就全部一次過買曬」。鄺港傑透露，他對繩子的認知僅限於童軍繩「我認為比較實用」，自幼便得知這個詞匯，惟從未見過童軍繩，因此向店員查詢哪款是童軍繩，店員則回應鄺港傑手上持有的便是童軍繩。鄺港傑供稱「其實我到而家都唔知邊個係童軍繩，反正我手上拎住呢兩個，佢話係，咁我就買晒佢囉」。

相關新聞：鄺港傑稱鄺球買湯煲絞肉機後解釋「部份幫朋友舖頭買嘅」

片中買童軍繩時提及「小朋友」因想「快啲完結對話」

庭上播放店內閉路電視片段，鄺港傑想購買童軍繩，店員問「你係咪玩童軍先？」鄺港傑曾回應「幫屋企人買囉」、「小朋友」，鄺港傑今解釋指當時「諗住快啲埋單，冇諗住chit-chat咁多」、「快啲完結咗個對話快啲走喇」。被問到何以不向店員交代要製作圍欄時，鄺港傑稱「因為當刻反正都買咗咁多嘢咯，總有嘢啱用啦，唔使再問佢意見喇」。鄺港傑補充在閉路電視片段對話謄本中看到自己曾提及「裝修」，指「我有問佢，佢係咁同我講打繩結，都唔啱channel。我買完就走啦，佢仲係咁問我⋯⋯」鄺港傑解釋買防滑手套因為「粗重嘢做工程又好做乜都好要呢啲手套」，至於買5對「個數字冇乜特別，買多啲咁」。鄺港傑知道同一時間鄺球「去咗間刀莊入面買嘢」。鄺港傑交代購物後要不直接交給鄺球，要不翌日帶到其龍尾村村屋內。

承認事實指，在2月9日鄺港傑在荃灣的日本城購買廚房剪刀、液態除臭劑、酒精抹紙、滴露消毒噴霧及空氣清新劑。鄺港傑憶述，當日收工後等待鄺球接他去用膳，而「呢間日本城係我放工嘅必經之路」，因此他在候車期間便進入日本城購物「諗住買啲『林審嘢』嘢適合我爸爸屋企」。鄺港傑解釋「因為我荃灣屋企有個櫃裝呢啲香噴噴嘢，例如廁所香精、噴霧，所以我認為爸爸屋企都會用得著呢啲物品，所以我就買咗一咋呢啲物品」。鄺港傑強調自己主動購買這些物品，沒有人要求他購買，隨後將這些物品放在龍尾村單位。

垃圾膠袋、螺絲批保鮮紙是「順手」或「搭單」採購

鄺港傑供稱，在2月10日他前往Megabox的AEON購買了垃圾膠袋、在IKEA購買儲物膠箱。鄺港傑解釋「當我買完一個箱之後，我爸爸覺得啱用，叫我買多個」，因此他便再次前往IKEA買儲物膠箱。由於AEON在IKEA的附近，因此「經過AEON就順手買埋個垃圾袋」，隨後將物品留待與鄺球見面時交給對方。

鄺港傑憶述2月13日偕鄺港智及母親李瑞香接送幼女到九龍城補習，等候幼女時3人於九龍城廣場吃下午茶，之後3人在商場內閒逛，李瑞香於其他店舖閒逛時，2兄弟前往日本城，「睇下有咩買囉，因為都幾鍾意行日本城，通常行呢啲生活百貨好鍾意帶啲嘢走，唔鍾意空手而回嘅⋯⋯咁我認為爸爸新屋有咁多嘢搞，我見到有螺絲批就可以買畀佢。以我認知佢新屋係冇呢樣工具嘅，仲買咗一卷保鮮紙嘅，搭單買㗎嘛」。

解釋片中以手指作打圈動作是想買木板、比圓形則買鎚子

鄺港傑回想鄺球其後反問「點解伶伶仃仃買得個螺絲批唔買其他？」由於鄺球要製作圍欄，鄺港傑指「佢要我買啲啱用嘅膠紙同鎚仔，同埋幫佢買啲黑色噴漆」，2日後遂到祥發號家品店購物。庭上今播放店內閉路電視片段，顯示鄺港傑瀏覽貨架後結果沒有購買噴漆，鄺港傑今指相信因為款式太多，決定其後再詢問鄺球意見。鄺港傑其後用右手食指在左手手掌前反覆打圈，鄺港傑今解釋當時手勢表示「插喺度綑住嘅嘢，相信係嗰啲木啦⋯⋯類似木板嗰啲嘢囉」，問到店員何者「適合用來做圍欄嘅work呢」，店員遂取來2卷黑色膠紙，稱「呢啲啱用㗎喇」。

片中鄺港傑再以左右手食指拇指比成圓形，然後用右手食指向左手轉，鄺港傑今指「幾年前小動作我唔記得喇」。片中店員其後取來圓頭鎚交給鄺港傑，鄺港傑今解釋當時「提及過我要做啲咩嘅work，我要買個鎚呀嘛，佢就推介呢個鎚啱用」。鄺港傑再瀏覽一下貨架，翻閱一下大門地毯，最終付款後離開。

鄺港傑提及，在2月15日他另購買了雙面膠紙，解釋「同另外兩卷嘅黑色膠紙一樣，我爸爸叫我買」，其後便將物品交予鄺球，他強調「全部我買嘅嘢都比曬佢」。承認事實指，鄺港傑在2月17日晚上7時50分駕駛AA3383前往龍尾村，並逗留了半小時。鄺港傑明言，未能記起為何逗留了半小時。

與蔡天鳳WhatsApp對話提及與電訊網絡職員談上網簽約事宜

庭上播放鄺港傑與蔡天鳳的WhatsApp對話，鄺港傑將蔡天鳳命名為「Abby (sister)」。蔡天鳳轉發兩個語音對話，當中一把男聲提及「Hello Stephy，你俾嘅contact咧我都打過去嘅，但係佢話就好似唔關佢事咁樣…」、「至於月費個度呢，簡單啲嚟講呢就係而家簽約嘅話呢就會有啲月費豁免…」等。鄺港傑隨即回應「吓！無電話打過俾我」、「佢講大話呃你」、「完全係點X你呢條友，大鑊」、「想耍你我諗，然後哄你續約」、「嘩呢條友唔得喎，好撚大鑊喎，你知唔知無人聯絡過我喎」。

鄺港傑致電對方後，向蔡天鳳匯報「嘩佢一開波係咁講Sorry係咁講唔好意思，好明顯身有屎啦呢啲」、「知你唔識呢就氹你續約….可能續約會有有回佣又剩，有佣金㗎嘛」、「佢無諗過我即刻打返電話俾佢話你無打過電話俾我本人，跟住佢話「哎呀，可能我打錯電話」。

鄺港傑解釋，蔡天鳳的別名是「Stephy」，一般「對街外唔熟嘅人用」，蔡天鳳轉發的語音訊息是加多利山的電訊網絡職員。鄺港傑提及，他負責處理加多利山的大小事務，而電訊職員繞過他直接聯絡蔡天鳳談論加多利山上網月費續約的事宜，可能是對方覺得蔡天鳳「呢方面嘅事宜無咁精明」，因此假扮聯絡不到鄺港傑而向蔡天鳳銷售電訊計劃。鄺港傑知道此事後，遂直接致電與職員對話，表示「如果直接同abby溝通係會無咁有benefit囉」。鄺港傑直言「如果係我能力範圍內」的事，蔡天鳳一般會找他處理「特別係關於加多利山嘅事情、屋企嘅事、同埋小朋友嘅事情」，而非找鄺港智。

鄺氏父子被指謀殺蔡天鳳

鄺港傑、鄺球、鄺港智同被控1項謀殺罪及1項阻止合法埋葬屍體罪。控罪指3人於2023年2月21日，在大埔汀角路龍尾村56B村屋地下內謀殺女子蔡天鳳，並在2023年2月21日至23日期間，於同地阻止合法埋葬蔡天鳳的屍體。三人否認謀殺罪，但承認阻止合法埋葬屍體罪。

本案以英語進行，由暫委法官祁彥輝（Brian Keith）審理，控方由外聘資深大律師郭莎樂（Charlotte Draycott）、高級助理刑事檢控專員梁育珩、高級檢控官林曉敏及吳希樂、檢控官尹培軒代表，鄺港傑由大律師Trevor Beel代表，鄺球由大律師戴偉奧(Oliver Davies)代表，鄺港智由大律師安華暉(Andrew Raffell) 代表。

案件編號：HCCC198/2025