蔡天鳳碎屍案｜鄺港傑稱鄺球買湯煲絞肉機後解釋「部份幫朋友舖頭買嘅」
發佈時間：12:17 2026-11-11 HKT
28歲名媛蔡天鳳（Abby Choi）2023年2月疑遭殺害後肢解烹屍，蔡天鳳前夫鄺港智、前家翁鄺球、前夫兄長鄺港傑否認謀殺罪。案件踏入第35日審訊，鄺港傑續出庭自辯稱父親鄺球租用龍尾村單位後，隨行到廚具店時看見對方購物「有個煲同有個銀色嘅機器之類」，鄺球解釋「一部份呢就佢屋企有用嘅，一部份呢就佢幫朋友舖頭買嘅」。鄺港傑交代由當日到案發期間，也沒有在龍尾村單位內見過上述意大利絞肉機。
稱受父親所託買儲物膠箱 後置放於弟友借用七人車
鄺港傑解釋，他在2023年2月6日收工後按習慣致電父親鄺球約食晚飯，得知鄺球在新租的大埔龍尾村單位，因此鄺港傑首次前往龍尾村見鄺球。承認事實指，翌日（7日）鄺港傑駕駛七人車AA3383前往Megabox的Ikea購買帶輪子長方形塑料收納箱、透明膠箱及密封塑膠袋等物品。鄺港傑供稱，他在2月6日首次參觀鄺球的新居後，鄺球「有同我講新屋有啲咩構思，叫我得閒幫佢買啲我自己喺荃灣用開嘅儲物膠箱」，而他的儲物膠箱是在Ikea購買，故他前往 Ikea為鄺球買箱。
鄺港傑又指，當他經過Ikea付款區時，見到其他不同的產品「我認為爸爸新屋有需要用到」，因此「就順手買埋」密封塑膠袋，密封塑膠袋並非鄺球指明要買的。同日晚上鄺港傑與鄺球向鄺港智的友人借了七人車VY9157，並打開AA3383的車尾箱將物品放入VY9157的車尾箱。鄺港傑確認將Ikea購入的收納箱搬出，惟未能記起有否連密實袋一同搬出。
鄺球解釋買煲與絞肉機部份屋企用 部份「幫朋友舖頭買」
鄺港傑續指到場後將七人車泊在鄺球七人車之後，鄺球當時不在車上，鄺港傑遂致電尋找鄺球，鄺球「同我講喺對面東亞廚具」，鄺港傑「望咗過去之後，東亞廚具個店員推住一啲物品去架車位置，我見到有個煲同有個銀色嘅機器之類，我就問爸爸『你買咗呢啲嘢？』」鄺球當時回答「一部份呢就佢屋企有用嘅，一部份呢就佢幫朋友舖頭買嘅」。由於鄺球尚未結帳，鄺港傑「睇下有冇啲咩嘢我自己屋企啱用，一邊等爸爸返去舖頭埋單」。
鄺港傑再指之後上前去收銀處查問鄺球「搞掂未？」然後「見佢哋篤緊catalog咁嘅嘢，我問佢『你買呢啲嘢呀？幾錢㗎要？』」鄺球回答「要幾萬蚊㗎」，鄺港傑回應「『咁貴呀⋯⋯』爸爸等咗2秒，可能覺得貴啦，我哋就一齊離開咗喇」。鄺球當時瀏覽的是廢物處理器，鄺港傑交代「冇問過佢」為何要購買廢物處理器，「佢買咗銀色嗰嚿嘢，佢話幫朋友買，再睇catalog，自然覺得佢幫朋友買」。鄺球所買的銀色機器為意大利絞肉機，鄺港傑交代由2月8日當日到2月23日期間，也沒有在龍尾村單位內見過上述意大利絞肉機。
承認事實指，鄺港傑在2月9日第二度前往龍尾村。鄺港傑透露，當日「放工之後揾爸爸食飯」，由於「我返咗成日工，揸咗全日車，我攰啦」，因此鄺球駕駛VY9157在荃灣接鄺港傑到龍尾村食飯。鄺港傑另確認，在2月11日下午4時許，他與鄺港智一同前往龍尾村，他解釋當日「要凑哥哥（鄺蔡子）去沙田學網球班」，網球班大約1.5小時，而沙田去大埔的車程只是10多分鐘，因此「我就提議細佬一齊去探下爸爸間新屋啦，因為細佬未去過」，他們抵達村屋「坐咗半個鐘之後，就去沙田接返小朋友」。在2月13日下午6時許，鄺港傑又再前往龍尾村，鄺港傑指「嗰日早咗少少收工，照舊揾爸爸食飯」。
鄺氏3父子被控謀殺蔡天鳳
鄺港傑、鄺球、鄺港智同被控1項謀殺罪及1項阻止合法埋葬屍體罪。控罪指3人於2023年2月21日，在大埔汀角路龍尾村56B村屋地下內謀殺女子蔡天鳳，並在2023年2月21日至23日期間，於同地阻止合法埋葬蔡天鳳的屍體。三人否認謀殺罪，但承認阻止合法埋葬屍體罪。
本案以英語進行，由暫委法官祁彥輝（Brian Keith）審理，控方由外聘資深大律師郭莎樂（Charlotte Draycott）、高級助理刑事檢控專員梁育珩、高級檢控官林曉敏及吳希樂、檢控官尹培軒代表，鄺港傑由大律師Trevor Beel代表，鄺球由大律師戴偉奧(Oliver Davies)代表，鄺港智由大律師安華暉(Andrew Raffell) 代表。
案件編號：HCCC198/2025
法庭記者：陳子豪 黃巧兒
