全運會│193賽後訪問黃澤林兩人妙問妙答笑死人

更新時間：20:43 2025-11-19 HKT
發佈時間：17:37 2025-11-19 HKT

黃澤林（Coleman）於全運會網球男單4強不敵吳易昺奪得銅牌，賽後他一如以往接受傳媒訪問，其中一個訪問他的傳媒竟然是男子組合ERROR成員193（郭嘉駿）。黃澤林一開口就責備193咁遲先嚟睇比賽，一嚟佢就輸，然後兩人哈哈大笑，朋友就係咁！

Coleman：你一嚟我就輸

黃澤林賽後看到193在混合採訪區準備訪問自己已經忍唔住笑，即刻問對方為何之前唔嚟？193馬上回應：「現家咪嚟咗。」 Coleman即回應：「你一嚟我就輸！」193唔知講乜好，只好以笑掩飾。之後193馬上拉開話題，話聽到觀眾叫「Let's go Coleman」，又有個女仔叫Coleman頂住，自己即刻毛管戙。

講咗一大輪193終於返回正題，問Coleman今仗有甚麼特別部署， Coleman答：「之前（與吳易昺）對賽過2次，今次第3次無特別部署，今仗只係差小小，盡咗力好享受。有小小蝕因為打埋雙打，佢無打，但係唔怪得人，係自己揀。」

後悔坐記者席

問完一條正經問題，193又講自己感受：「後悔坐係記者席。」黃澤林即刻抽193水：「應該坐港隊位置，嘭嘭聲！」再一次展現兩人友情關係，乜都講得。Coleman又提及昨天港隊亞洲盃賽事：「昨天睇港隊輸波好可惜，諗住自己可以安慰吓大家心情，點知唔得。不過都已搏盡無憾。」

193叫Coleman幫手推歌

接著193又模仿體記問黃澤林關於未來的計劃，Coleman笑住答：「可唔可以唔好咁認真？無計劃，知道話你知。」此時，又輪到193「吋」Coleman：「今日我原本有野做，守承諾先至過嚟。其實我今日出新歌，個名係《你的名字我的聖詩》，幫手推介吓。」 Coleman有啲唔太情願咁講：「留意我老友嘅新歌，記得支持。」這個訪問就係咁響歡笑聲完結。