世界盃2022｜專家分析:法國真係無堅不摧？

更新時間：14:30 2022-12-12 HKT
發佈時間：14:30 2022-12-12 HKT

最後兩場八強賽事塵埃落定，摩洛哥連殺雙「牙」，C朗拿度未能「有終之美」。英格蘭僅敗法國，累計喺世界盃八強輸咗七次，呢個紀錄係眾國之冠。

老實講，論今場表現，英格蘭唔值得一場敗仗。不論射門次數、禁區組織、死球攻勢等，英格蘭絕對好過法國。當見到哈利馬古尼嘅頭槌「只差一點點」，艾爾不禁大嗌：「有無黑到咁呀？」不過，正如艾爾之前喺文章所講，「三獅」最大嘅敵人始終係自己，就連畀人哋咁安心嘅哈利卡尼，第二球十二碼都可以射到「全壘打」咁，球隊除咗要換教練之外，心理方面更要多加培訓。

法國呢場先靠曹亞文尼嘅「神來之筆」領先，下半場再靠「銀河唯一」基奧特入波奠定勝局。艾爾曾經講過，法國係「皇馬2.0」，原因係全隊波粒粒皆星，喺戰術組織嘅比重唔多，同皇馬無乜分別，即係屈個人質素。麥巴比同丹比利屈速，基奧特屈體格同射手觸覺，基本上只要個波擺到兩邊，就點都有威脅嘅埋門機會。

講到法國咁恐怖，係咪無嘢可破呢？艾爾覺得「高盧雞」未到無堅不摧嘅境界，因為中後場防守唔穩陣。今場對英格蘭清楚見到，烏柏美卡奴對住哈利卡尼，守得非常狼狽。

曹亞文尼喺防守上做唔到嘢，有球十二碼正係佢剷跌布卡約沙卡。迪奧靴南迪斯攻強過守，無厘頭撞低對手輸十二碼。球隊本身唔擅長防守，領隊迪甘斯又出名保守，即使前面入咗波，但往往喺領先緊一球後拖慢，成日被對手追番。

艾爾絕對唔質疑法國球員嘅質素能力，但始終足球係十一個人踢，唔係純個人競技，嚟緊對住防守反擊非常厲害嘅摩洛哥，如果繼續用一種咁保守嘅心態去迎戰，艾爾只可以講句：祝你好運！　—艾爾