晨光追擊│ 「仁仁之寶」值得一博

更新時間：16:32 2023-10-10 HKT
發佈時間：16:32 2023-10-10 HKT

黎昭昇上季開倉口碑不俗，在港吸取一季經驗後，加上練者購入的質新馬陸續上陣，預期今季能交出更佳戰績，亦因為兵力充沛，不會貿貿然接收轉倉馬，所以收得多數有計，正如明晚的「仁仁之寶」。

第四場第四班一二○○米：「金運來」的台型不俗，試閘一再有出色表現，所以首戰縱使只配潘明輝，依然被捧到四十一蚊，可見幕後充滿信心，但該仗此駒過於搶口，一早用盡力氣以致衝刺乏力。之後三仗「金運來」變成冷門，表現同分數成正比，尚要表現欠奉，毫無睇頭。

去到上季727場，「金運來」突然又被熱捧，原因是得到潘頓垂青，該仗再無令幕後失望了，飛到馬到勝出，且見韁口大有改善，自此潘頓亦高度重視此駒，之後跨季兩戰繼續披甲，雖然均無功而還，但次次檔差敗不作準。近期見「金運來」試多課閘，試來前後兼備表現出色，潘頓再度披甲，不勝無歸。

第五場第四班一○○○米：尚未上陣筆者已留意住「仁仁之寶」，因為靚仔俊俏，當時更得到莫雷拉高度重視，初出在強組入位表現亦好。跑到第三個回合，終於由雷神披甲，結果初跑千四留前鬥後輕勝，就算之後兩戰負重遇慢步速亦追近。上季「仁仁之寶」六十分起步，首戰爭四班表現失色，接戰改攻三班卻衝刺如箭入位，加分後長時間在三班，無奈跑法被動未能再贏，而季尾重返四班再輸兩場，疲態盡現。

「仁仁之寶」現時已減到與贏馬時相若五十三分，加盟黎廄後重現朝氣，試兩課閘同樣戴上眼罩，不論谷閘用跟前，又或泥閘留後一樣躋身前列。無可否認一千對「仁仁之寶」嫌短，不過對手弱得多，仲要加罩後分分鐘擺到前走，路短依然值得一博。

兆文

立即下載 | 全新《星島頭條》APP : https://bit.ly/3yLrgYZ