Chok王心得｜刺激人氣總好過無

更新時間：17:46 2023-09-24 HKT
發佈時間：17:46 2023-09-24 HKT

自己一向無留意每個賽日投注額的多寡，畢竟唔關馬事，沒有多餘時間兼顧，個人亦對數字不感興趣。不過，聽聞開季至今，每個賽日「盤數」都唔多靚，動輒無咗一兩億，暫時睇唔到有竄定之勢，投注額係咪繼續有落無上？怕且短期內唔會有變。
三年疫情，出境麻煩，市民焗住留港消費，賽馬活動是受益者之一。然而，當關口重開，人人走出去，本地食肆叫苦連天，賽馬活動哪可獨善其身？導致投注額大不如前，堅係無可避免。
依家搞緊夜經濟，馬會亦助一臂之力，有無成效好難講。不過，總好過乜都唔做。須知道，有得揀，人人都想做老闆。有咩着數，有咩優惠，就算唔係人人貪，肯定唔會無人貪。假如推出多項消費優惠，多少刺激到人們入場意慾，縱使一時三刻未必幫到投注額，也許谷到人流，撐下場面，熱熱鬧鬧，點都好睇啲。

洪禮賢

立即下載 | 全新《星島頭條》APP : https://bit.ly/3yLrgYZ