商台《在晴朗的一天出發》DJ蔓兒被炒與盧覓雪言論有關？開live回應揣測：大家都係被動嘅一方
發佈時間：19:00 2025-07-02 HKT
在商台節目《在晴朗的一天出發》任職幕後的DJ蔓兒自爆已加入失業大軍行列，上星期突然收到解僱通知：「原以為又係尋常嘅工作天，結果變咗last day。」因盧覓雪（Michelle）曾在節目上曾評論姜濤墮海事件並說「智商有問題」，事後惹來不少爭議聲，翌日兒突被商台即時解僱，於是有令人揣測被炒一事與盧覓雪事件有關。
蔓兒多次表示被炒與盧覓雪一事無關
蔓兒昨晚（1日）開IG Live為事件開腔，她多次表示被炒與盧覓雪一事無關：「其實嗰啲說法都係講嗰啲人力資源調配嘅問題，我再講一次，唔關上星期《晴朗》發生嘅事》事，大家都係被動嘅一方，同埋我聽日（即今日）都約咗佢哋食飯，所以冇嘢。」
相關閱讀：商台《在晴朗的一天出發》DJ蔓兒突然被炒 即時離職原因未明惹揣測：睇到兩張支票就喊唔出
商台DJ蔓兒被炒與盧覓雪一事無關：
蔓兒與《晴朗》張部長盧覓雪阮子健食飯
蔓兒今日IG貼上與《晴朗》監製張部長、盧覓雪和阮子健食飯的相片並說：「無咗蔓兒太陽照常升起，晴朗照常出發！話晒湊咗你哋咁多年，幾個大個仔大個女都係時候要獨立㗎啦！蔓兒而家終於可以un un 腳安享退休生活。話説今日好潮嘅盧覓雪請食潮嘢，跟住自助餐KOL張部長就話下次請食buffet！阮子健未諗之後請食咩，不過送咗盒『前男友超後悔吸睛面膜』畀我，寓意深長，果然係文人。#你哋每朝繼續努力奮鬥加油#蔓兒有時早起或者未瞓都可能聽吓嘅。」
蔓兒稱在商台人工非常低
談到當日收大信封經過，蔓兒說：「總之嗰日如常做節目，之後突然收到二台秘書通知，話『校長』搵我，仲要去會議室坐底，我個心已經有少少不祥預感。」蔓兒又稱：「原來『大信封』係冇信封，得張紙同到兩張支票，包括長期服務、即日通知及補一個月薪金，啲數好和味，當時有啲sad，但只要你望一望兩張cheque，雖然我喺商台嘅人工真係非常低，但係當你乘以咁上下年份，再加呢樣嗰樣，其實都係唔錯嘅。」故立即book機票下周三去東京旅行。蔓兒再說：「有人辭官歸故里，有人漏夜趕科場，其實冇話冇咗邊個唔得嘅，同樣地都冇話冇咗份工唔得嘅。正所謂冇老公都得啦，單身一輩子，最緊要有錢錢。我而家有錢錢。本身返工都係為錢錢。我而家有錢錢就唔使返工喇。」
相關閱讀：林海峰順應民意開腔談盧覓雪 借「閑」字語帶雙關緩和氣氛：逢星期五都會換主持
蔓兒主動提到被連登帖文指「狙擊姜B」
蔓兒亦主動提到被連登帖文指曾「狙擊姜B」：「我想講我threads都有個post，姜B出事嗰日我係有講，希望大家建立自己，唔需要攻擊其他人。我冇話鍾意唔鍾意，咁你咪睇自己鍾意嘅嘢囉，正如我鍾意Gareth（湯令山）我咪睇Gareth囉，我唔需要睇啲我唔鍾意嘅嘢。或者啲人咁樣發洩，但我唔鍾意。時間有限，我只係會擺時間喺自己鍾意嘅嘢度。我唔鍾意嘥時間喺唔鍾意嘅嘢度，所以我都唔明白啲網民邊聽邊鬧，其實應該聽自己鍾意嘅節目，你成日聽啲激嬲自己嘅嘢，其實你心理都唔平衡㗎。」
