港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

【頭條獨家】喺老公眼中全世界最靚　黃天頤讚C君把口𠱁死人

即時娛樂

更新時間：21:39 2020-07-08 HKT
發佈時間：21:30 2020-07-08 HKT

天頤自爆經常獲C君讚叻，口甜舌滑。

「C君嫂」黃天頤近日於ViuTV節目《索女人妻ichi烹》中，跟34C索女樂宜比拚廚藝，說到對手來勢「胸胸」，天頤也笑稱有少少壓力，但會繼續行親民貼地路線，還大方容許老公C君（鄭詩君）𥄫靚女，她笑言：「有時都會同佢講『呢個女仔幾靚』，但佢好醒答我『吓！邊度靚呀？』仲成日讚我。」把口真甜！採訪：黎寶倫　髮型：Richie@Leighton Avenda Salon　化妝：nikileungmakeup

天頤好慶幸老公C君私下都好多嘢講又會搞吓笑。

見樂宜（左二）身材Fit到漏，被分入「人妻組」的天頤都表示心服口服。

去年尾黃天頤下嫁拍拖4年的C君，以為升呢人妻後廚藝會大躍進，殊不知家中大廚原來是C君，「我本身唔太煮嘢食，係佢煮多，我負責洗碗，佢會煮家常便飯，例如雞翼、蒸蛋、肉餅，好少煮西餐。」故今次在節目中挑戰煮西餐，連充當「白老鼠」的C君都無資格批評，不過講講吓，天頤就忍唔住爆老公超強𠱁女技能，「佢好識交戲，譬如我煮到一半未成形，佢就行過讚：『幾好喎，似模似樣，好叻呀你！』畀信心我，識咗咁耐佢都冇彈過我。」並謂婚前也問過對方可介意自己不懂下廚，略懂術數的C君竟答：「從來冇Expect你會煮嘢食，你都唔適合煮嘢，因為忌火。」

天頤甚少下廚，但她自稱好有廚藝天分。

天頤首次炮製台式滷肉飯，獲老公讚有台灣便利店水準。

暫冇生B計劃
有個「廿四孝老公」真幸福，天頤卻反駁：「我都有做家務㗎！幸福唔係佢識做幾多嘢，係佢唔嫌棄我唔識做幾多嘢。（自覺幸福人妻？）暫時係嘅，始終都係結咗婚半年，生活上冇太大改變。」至於造人大計，雖然已作身體檢查，下一代遺傳嚴重地中海貧血的機會不大，但天頤仍沒有膽量生B，「暫時冇生B打算，我覺得生BB比結婚更大𠄘諾，而家成個社會環境都唔係好穩定，唔知將來會點，我覺得我哋未有十足信心會照顧得佢好好或畀到佢一個適合嘅環境。（索性唔生？）冇咁決絕，而家言之過早。」