港聞

娛樂

最Hit

即時

中國

國際

星島申訴王

財經

地產

生活

健康

教育

體育

大灣區

專欄

馬經

PLUS

【頭條獨家】壓力爆標拍《失蹤》狂嗌喪跑歇斯底里阿嬌自爆發晒脾落老公身上

即時娛樂

更新時間：12:08 2019-11-09 HKT
發佈時間：21:08 2019-11-08 HKT

阿嬌同時間要兼顧三套作品拍攝，絕對是精神和體力的考驗。

阿嬌鍾欣潼去年正式嫁畀台灣醫生、「醫界王陽明」賴弘國後，工作冇放慢腳步，婚後首部電影、跟凌文龍（小龍）首次合作的《失蹤》亦快將推出。電影主題講「結界」，戲中阿嬌為搵失蹤多年的父親，經常要狂嗌、喪跑、歇斯底里，她同期仲要拍攝另一部電影，再加上要跟當時仍未註冊的賴醫生飛去英國拍攝內地真人騷《爸媽學前班》，阿嬌自爆一度壓力爆標抽離唔到，將脾氣發晒喺老公身上。不過學小龍話齋，兩人最終順利結婚，證明阿嬌當時冇嚇怕賴醫生，賴醫生仲似乎好適應有個演員老婆添！撰文：杜淑霞攝影：李維隆髮型：Amber Tse @ IL Colpo Central(阿嬌)、Alva Lam(小龍) 化妝：Yan@Ndnco(阿嬌)、Connie Lai(小龍) 服裝：Polo Ralph Lauren(阿嬌) 場地：香港九龍貝爾特酒店

小龍戲中飾演照顧者，心情好沉重，每日拍完都想快點抽離角色。

阿嬌和小龍因為監製伍健雄接拍，並首度跟新導演趙羅尼（右二）合作。

電影以孔明的網絡熱爆小說《失蹤》改編，雖然阿嬌和小龍開拍前未睇過，但因故事吸引、加上監製伍健雄關係而接拍，而阿嬌更坦承本身對真人真事特別感興趣，「呢個故事係真人真事，自己一向都好鍾意睇啲真人真事嘅電影，所以有機會都想拍。」

自揭患人群恐懼症
劇中阿嬌飾演7年前父親行山失蹤、一直未有放棄尋父的社工「薛芷盈」，由於期間誤入「結界」，所以當中有不少情緒失控的戲份，雖然阿嬌自問不是容易受角色影響情緒的人，但由於同時間要拍電影《女子監獄》，又要拍內地真人騷《爸媽學前班》，搞到她終於忍唔住要爆啦！阿嬌說：「嗰時我真係冇時間做番自己，拍真人騷嗰段日子我真係抽離唔到，將拍嘢嘅情緒，將個脾氣發晒喺佢（老公）身上，仲要嗰時未結婚！」追問阿嬌老公會否嚇窒咗，見到呢一面？小龍即代答：「即係冇問題，都結咗婚！」阿嬌更自爆跟老公拍完真人騷後互相更了解，「佢拍完就會明白，平日咁多鏡頭對住，做咩都有人影住係咩感覺，係會有幾大壓力！」阿嬌又好多謝今次電影團隊好多正能量，「我其實係有小小人群恐懼症，同埋唔知點同人相處，尤其係陌生人，今次大家不斷鼓勵大家，互相支持感覺好好。」

戲中阿嬌有不少喪跑戲份，而且要在樹林中拍攝，相當吃力。

阿嬌在公屋拍攝時，由於要不斷跑和嗌怕影響到居民，難得他們好合作，「竟然冇人會申個頭出嚟望。」

除了情緒，阿嬌話這套戲需要體力一樣大，因有不少喪跑戲，拍攝時仲自己行上山拍攝，「最初都擔心㗎！我平時冇做運動，都驚抽筋、唔夠力、嘔咁樣，所以有去啲行山用品舖買定啲能量食品同燈咁，後尾都冇拎過出嚟用，證明自己體力都OK。」講到戲中的樹林戲，小龍透露拍得特別辛苦，「除咗拍嘅時候啲工作人員要抬啲器材上去辛苦，最慘係拍拍吓，遇到颱風山竹，好多樹林冇咗，又驚嗰樹易掉落嚟會有危險，結果搵咗好多公園。」阿嬌補充：「有啲其實係空地嚟，真係好考佢哋功力。」

戲中阿嬌和小龍雖然冇感情戲，只飾演鄰居，但也有不少對手戲，小龍謂有機會集齊Twins好開心，「佢由細我睇到佢大呀！（阿嬌：我哋一齊成長！）好開心好玩，之前舞台劇（《情敵勸退師》）同咗阿Sa（蔡卓妍），今次同埋阿嬌，Yeah！齊咗Twins啦！」問阿嬌會否想下次她跟小龍合演舞台劇，她想了想說：「真係好難，睇緣份，隨緣啦！但如果演舞台劇首選同小龍合作。」問到兩人下次想合演何種關係，小龍繼續搞鬼：「keep住做鄰居，可能我劈佢呀！」