【頭條戲場】《聖慾》睇到面紅修女She She情

更新時間：20:49 2021-09-10 HKT
發佈時間：07:15 2021-09-11 HKT

Benedetta(右)同野性修女Bartolomea(Daphné Patakia飾)，留意前者拎住個聖母像，用途好廣泛。

首先要讚吓香港譯名，一睇就知套戲講乜然後好想入場，成功吖。電影講述17世紀意大利文藝復興時期一間修道院內兩位女同志的情慾故事，冇錯，即係修女「she she情」，請嚟Virginie Efira及「英國資深影后」Charlotte Rampling主演，留意返，電影根據17世紀的真實歷史紀錄改編，即係件事真係發生過。電影於康城影展首映，並參與金棕櫚獎的角逐，散場獲得全場觀眾起立鼓掌五分鐘，爛番茄新鮮度有85%。親身觀影感覺，真係好「甜」，睇到面紅。(已上映) 撰文:廖思慧

Benedetta成日都話自己見到耶穌。

Bartolomea逃逗完Benedetta，後者即去告解。

荷蘭名導Paul Verhoeven係90年代當時得令的導演，拍過《本能》、《鐵甲威龍》同《宇宙威龍》等，近年就有《烈女本色》。戲中女角Benedetta(Virginie Efira飾)成長於修道院，在神的聖寵下，佢不但能見到神聖異象，身上更出現聖痕。有一日，佢被年輕又野性的見習修女挑逗，內心瞓咗好耐嘅毒蛇被整醒，初試肉體歡愉一發不可收拾。

Benedetta兩隻手掌都流緊血，大家都認為係聖痕。

梵蒂岡神職人員認為Benedetta講大話而要燒佢。

127分鐘話咁快就過
當然好多人以為自己做過嘅嘢冇人知，其實天知地知你知我知，因為聖痕而升上神枱的Benedetta被有心人監視，演變成權力鬥爭。電影精彩在於導演野心超大，戲中有大量對宗教嘅嘲諷，好寸又好好笑，一路睇一路擔心導演。故事好有驚喜，片長127分鐘完全唔覺，咪以為難得修女「She She戀」會好可歌可泣，唔係囉。點解導演會拍套咁踩界嘅電影?佢就咁講:「17世紀時嘅社會由男性主導，女性除咗滿足男性嘅性慾及生殖需求外一文不值，亦冇任何權力；但Benedetta運用自己的才能、遠見、手段、謊言及創造力，成功登上權位，不但被視作聖人，也出任修道院嘅院長，聲名遠播。」簡單嚟講，因為聰明而引起導演的興趣。